Belgııa vırýsologteri maımyl sheshegine bola alańdaýǵa negiz joqtyǵyn aıtady

BRıÝSSELЬ. QazAqparat - Belgııada maımyl sheshegin juqtyrýdyń tórtinshi deregi tirkeldi, dep habarlaıdy QazAqparat menshikti tilshisi.

Qazir Vallonııada em qabyldap jatqan naýqas osy aıda Antverpen qalasynda ótken festıvalde bolǵan. Taǵy eki naýqastyń da osy sharaǵa qatysy bar. Leven ýnıversıtetiniń vırýsologi Mark Van Ranst osy festıvalde bolǵandardyń barlyǵyn saqtyqqa jáne aýrýdyń alǵashqy belgileri baıqalsa, birden jaqyn mańdaǵy medıtsınalyq mekemege júginýge shaqyrady.

Al, taǵy bir vırýsolog Pıt Maes Belgııada maımyl sheshegi keń taralyp ketedi dep alańdaýǵa negiz joqtyǵyn aıtady. Onyń paıymdaýynsha, eldiń 50 jastan asqan turǵyndarynda 1981 jylǵa deıin salynǵan vaktsınanyń arqasynda ımmýnıtet qalyptasqan. Qalǵandarǵa da qaýip sonshalyqty qatty emes.

«Búkil álemde bul aýrýdyń birneshe oshaǵy bar. Ádette, Kongoda jyl saıyn birneshe myń adam aýyrady. Alaıda, Eýropada bul vırýs óte sırek shyǵady. Bul - qyzyq ǵylymı fenomen, biraq alańdaýǵa negiz joq», - deıdi ol.

Qajetine qaraı, belgili bir kezeńderde jastarǵa vaktsına salynýy múmkin. Degenmen, ekpe salýdy bastaýǵa ázirge sebep joq. Mamandardyń aıtýynsha, eger aýrýdyń taralýy geometrııalyq progreste damıtyn bolsa, sonda ekpe egý qajet bolady.