Belgııa dúkenderinde jándikterden ázirlengen taǵamdar satylmaq
ASTANA. QazAqparat - 19 qyrkúıekten bastap Belgııa dúkenderinde jándikterden ázirlengen azyq-túlik ónimderi satyla bastamaq. Túrli shegirtkeler men qurttardan jáne t.b. jybyrlaǵan jándik ataýly qosylyp daıarlanǵan taǵamdardy "Delez" (Delhaize) sýpermarketter jelisinen satyp alýǵa bolady.
Bul jańa ónim túrin satýmen aınalysatyn alǵashqy saýda jelisi. Jaqynda onyń sórelerinde «Jasyl qońyzdar» (Green Bugs) dep atalatyn un qurttarynan ázirlengen gambýrgerler de paıda bolmaq, dep jazady Vestı.rý.
Aıta keteıik, Belgııa jándikterdi taǵamǵa paıdalanýdy zańdy túrde engizgen Eýroodaqtaǵy alǵashqy el bolyp otyr. 2013 jyldyń jeltoqsan aıynda el bıligi jándikterdi ósirip, taǵam retinde tutynýǵa ruqsat bergen. Endi mundaı kásippen aınalysýdy nıet etken kásipkerler arnaıy sertıfıkattaýdan ótkizilmek. Belgııanyń azyq-túlik ónimderiniń qaýipsizdigimen aınalysatyn agenttigi as-aýqat retinde paıdalanýǵa jaramdy on jándikti atady. Olardyń qatarynda shegirtkelerdiń birqatar túrleri, sondaı-aq qurttar men juldyzqurttar bar. Al álemde jándikterdiń 1,4 myń túri jeýge jaramdy. Zertteýler kórsetkendeı, olar janýarlar eti nemese balyq tárizdi adamǵa paıdaly aqýyzǵa óte baı.
