Belgııa: Densaýlyq saqtaý mınıstrin artyq salmaǵy úshin jumystan shyǵarýy múmkin
ASTANA. QazAqparat - Birneshe kún buryn ǵana Belgııanyń Densaýlyq saqtaý mınıstriniń ornyna otyrǵan 52 jastaǵy Meggı de Blok synǵa ushyrap úlgerdi. Onyń bári sheneýniktiń salmaǵynyń 128 keli bolýyna baılanysty eken. Kóptegen azamattardyń pikirinshe, mundaı adam salaýatty ómir saltyn ustanatyndarǵa úlgi bola almaıdy, dep habarlaıdy Mirror .
Shyn mánisinde, Meggı de Blok Belgııadaǵy eń tanymal saıasatkerlerdiń biri sanalady. Keıbir sarapshylar oǵan premerdiń orny da laıyq dep sanaıdy. Alaıda, jaqynda bılikke kelgen ony densaýlyq saqtaý mınıstri etip taǵaıyndaǵanyna jergilikti jýrnalıster tańyrqap qaldy.
«Sport pen durys tamaqtanýǵa baılanysty mindetti ol qalaı atqarady», - deıdi keıbir BAQ ókilderi. Belgııa úshin bul ereshe mańyzdy, sebebi, statıstıkaǵa sáıkes, el halqynyń shamamen 47 paıyzy artyq salmaqtan zardap shegedi.
Al Blok hanymnyń ózi bolsa qandaı da bir túsinikteme bermeı júr. «Maǵan meniń syrtqy keıpime qarap baǵa berýdiń qajeti joq. Qansha degenmen, men top-model emes, saıasatkermin», - deıdi sheneýnik.
Osyǵan deıin Meggı de Blok ımmıgratsııa isteri mınıstriniń ornynda otyrdy. Sol kezde Belgııa azamattyǵyn alǵysy kelgenderge ońaı bolǵan joq. Belgııada baspana alýǵa baılanysty keri qaıtarylǵan ótinishter shamamen eki ese ósti.
