Belgııa alǵash ret alkogol tutynýǵa shekteý qoıatyn arnaıy jospar qabyldady
BRıÝSSELЬ. QazAqparat - Sársenbi kúni Belgııanyń Federaldyq mınıstri Frank Vandenbrýktyń tóraǵalyǵymen el úkimeti halyqtyń alkogoldi ishimdikterdi tutynýyn azaıtýǵa baǵyttalǵan 2023-2025 jyldarǵa arnalǵan jeke is-sharalar josparyn bekitti, dep habarlaıdy QazAqparat tilshisi.
Belgııanyń densaýlyq saqtaý mınıstrligi alkogoldik ishimdikti shamadan tys tutynýdy kemitýdi kózdeıtin 75 baǵyt boıynsha federaldyq josparyn bekitti.
«Bul qujattyń negizinde Belgııanyń aımaqtyq úkimetteri de alkogoldi shekten tys paıdalanýmen kúreste birlesip jumys isteýge yntaly bolyp otyr», dedi mınıstr Frank Vandenbrýk.
Aıta ketý kerek, bul - osy eldegi alkogoldi ishimdikti tutynýdy azaıtýǵa baǵyttalǵan eń alǵashqy shara.
«Biz birlese otyryp qana elimizde alkogoldi ishimdikti shamadan tys paıdalaný máselesin sheshe alamyz. Men bul jospardy áriptesterim men el úkimeti maquldaǵanyna shyn júrekten qýanyp turmyn», - dedi Frenk Vandenbrýk.
Belgııanyń Densaýlyq saqtaý mınıstrligi, sondaı-aq bul qadamnyń eldiń alǵa qoıǵan mańyzdy jobasy ekenin atap ótti. Sebebi, alkogoldi shamadan tys tutyný eń aldymen densaýlyq saqtaý júıesine, sondaı-aq ádilet, qarjy, jastar, polıtsııa, tipti qonaq kútý salalaryna da keri áserin tıgizietini anyq.
Jańa jospar el turǵyndaryna alkogoldi shamadan tys paıdalanýdyń zııany mol ekeni jaıly (mysaly, qaterli isik) aqparattardy, jadynamalardy úzdiksiz jetkizip otyrýdy qamtıdy. Mundaı is-sharalar ishimdikti shamadan tys paıdalaný kezinde syrqatty dálirek anyqtaýǵa, densaýlyqty ońaltýǵa, medıtsınalyq kómekke qoljetimdilikti jaqsartýǵa, jáne jol-kólik oqıǵalaryn azaıtyýǵa oń áser etpek. Joba negizinde ózge de sharalardy qoldaný kózdelip otyr.
Belgııa úkimeti qabyldaǵan sharalar Dúnıejúzilik densaýlyq saqtaý uıymynyń (DDU) jáne Densaýlyq saqtaý joǵary keńesiniń usynymdaryna negizdelgen.
Kámelettik jasqa tolmaǵandardyń alkogoldi qospalardy tutynýy erekshe baqylaýǵa alynbaq. Sonymen qatar úkimet alkogol óndirýshileriniń marketıngtik josparyn erkin júrgizýge, ashyq túrde taratýǵa jol bermeý úshin jarnamalardyń da qatań erejelerin engizýdi qoldaıdy. Bılik eldegi radıo men teledıdarda kámeletke tolmaǵandarǵa arnalǵan baǵdarlamalardyń basynda jáne sońynda alkogoldi jarnamalaýǵa tyıym salatyn zańdardy kórsetýdi de kózdep otyr. Sondaı-aq federaldy úkimet ǵalamtor jelisinde, kámeletke tolmaǵandarǵa arnalǵan áleýmettik jelilerde alkogoldi ishimdikterdi jarnamalaýdy shekteý úshin arnaıy erejeler ázirleý ústinde.
Budan bylaı Belgııada saǵat 07:00-den 22:00-ge deıin avtomagıstraldar boıyndaǵy dúkenderde alkogoldi ishimdikterdi satý toqtaıdy. Odan bólek, alkogoldi ishimdikter satatyn avtomattar da qatań baqylaýda bolady.
