Belgııa 16 jastan bastap daýys berý quqyǵyn engizdi
ASTANA. QazAqparat – Belgııa bıligi el azamattary úshin Eýroparlament saılaýynda 16 jastan bastap daýys berýge ruqsat berdi, dep habarlaıdy QazAqparat euronews-ke silteme jasap.
Osylaısha Belgııa Eýropalyq odaqta mundaı sheshim qabyldaǵan Malta, Germanııa men Aýstrııadan keıingi tórtinshi memleket bolyp otyr.
«Jas shegin tómendetý arqyly biz naqty sıgnal jiberip otyrmyz. Biz sizdiń daýysyńyzdy da, pikirińizdi de estigimiz keledi», - dedi Belgııanyń ishki ister mınıstri Annelız Verlınden.
Osylaısha, 280 myńǵa jýyq jas belgııalyq azamat kelesi jyly eýropalyq deńgeıde óz pikirin bildirý múmkindigine ıe bolady. Biraq saılaýshylar tizimine avtomatty túrde enetin eresekterden aıyrmashylyǵy, daýys berýdi qalaıtyn kámeletke tolmaǵandar aldyn ala tirkelýi kerek.
