Bekzat Sattarhanovtyń rólin somdaýǵa bala kezden daıyndaldym -akter
«Habar» agenttiginiń tapsyrysymen túsirilgen fılmniń sıýjettik jelisinde Bekzat Sattarhanov ómiriniń úsh kezeńi qamtylady. Balalyq shaǵy, boz bala kezeńi jáne ómiriniń sońǵy sáti. 90 jyldardyń basyndaǵy qıyn-qystaý zamanǵa tap kelgen Bekzattyń balalyǵy kóp qıyndyqtarmen ótedi. Túrkistan qalasyndaǵy temir joldy boılaı ornalasqan shaǵyn aýyldyń qarapaıym tirshiligi bala Bekzattyń kózimen beınelenedi. Onyń armany, namysqoı bitimi árbir sátte synalyp otyrady.
Fılmniń tusaýkeserinde «Habar» agenttigi AQ Basqarma tóraǵasynyń birinshi orynbasary Rınat Kertaev túsirilim týraly aıtty.
«Bekzat Sattarhanov týraly tuńǵysh avtobıografııalyq týyndyny taspalaýdaǵy maqsatymyz - erte sóngen juldyzdyń sanaýly ǵumyryndaǵy jigerli jetistikterin, qaıtpas qaısarlyǵyn, uljandylyǵy men namysqoılyǵyn kórsetý arqyly - búgingi jas urpaqty rýhtandyrý, jas sportshylarymyzǵa buqaralyq salaýatty ómir saltyn nasıhattaý bolyp tabylady», - dedi Rınat Kertaev
Kartınanyń rejısseri - Murat Bıdosov, stsenarııin Serjan Zakeruly jazǵan. Fılmniń túsirilim jumystary Túrkistan, Almaty jáne Ystanbul qalalarynda ótken. Basty róldi jas akter Samat Ázimqulov oınaıdy. Ol 2006-2007 jyldary kıkbokstan jastar arasynda eki ret Qazaqstan chempıony bolǵan. Jas akter ári sportshy Bekzat Sattarhanovty beıneleý asa qıyn soqpaǵanyn aıtady.
«Bul fılmde basty rólin somdaýǵa bala kezden daıyndaldym. Óıtkeni bala kezden-aq Bekzat Sattarhanov meniń súıikti sportshym boldy. Onyń ómirin mektep kezinen tanysyp, bilip júrdim, zerttedim. Sondyqtan maǵan jeńil boldy. Tek qana rejısserdiń bergen talaptaryn oryndap shyqtym. Al, rólge keler kezde maǵan rejısser shaqyryp, sóılesip, usynys jasady»,- deıdi Samat Ázimqulov.
Samat Ázimqulov túsirilim kezindegi qyzyq oqıǵalary týraly aıtty.
«Túsirilim kezinde kóptegen qıynshylyqtar da boldy. Ásirese kósheniń tóbelesterin túsirip jatqan kezde birneshe soqqy alǵan sátter boldy. Fılmde eń tolqytatyny, Bekzat aǵamyzdyń fınaldaǵy jekpe-jegi. Sol jeńiske jeter kezde Bekzat Sattarhanov Amangeldi Seıithanovpen sóılesip, «Men jeńiske jetemin, sol jeńisimdi Túrkistannyń 1500 jyldyǵyna arnaımyn, sony halyqqa habarlańyz» degen sáti bar. Sol sátti túsirer kezde qobaljyp, kózime jas alǵan kezder boldy. Bir emes úsh-tórt dýbl jasaýǵa týra keldi»,- deıdi akter Samat Ázimqulov.
Kórsetilimde Bekzat Sattarhanovtyń ata-anasy qurmetti qonaq retinde qatysty.
«20 jas ǵumyrynda qolynan kelgenshe eline barlyq kúsh-jigerin berip ketti. Bekzatqa qandaı marapat, qandaı kıno shyǵarsa da artyq bolmas. Bekzatty jastardyń aldyna úlgi etip qoısa... onyń ımandylyǵy, úlkendi syılaýy, qazaqylyǵy, birbettiligi, alǵa qoıǵan maqsatyn oryndaıtyn minezi qazirgi qazaq jastaryna kerek», - deıdi sportshynyń ákesi Seıilhan Sattarhanov.
Aıta ketsek, tolyq metrajdy kartına 3 qazannan bastap elimizdiń kınoteatrlarynda kórsetile bastaıdy.