Bekzat Sattarhanov týrnıriniń jeńimpazdary anyqtaldy
ASTANA. KAZINFORM – Túrkistanda Sıdneı Olımpıadasynyń jeńimpazy, «Barys» ordeniniń alǵashqy ıegeri Bekzat Sattarhanovty eske alýǵa arnalǵan bokstan jastar arasyndaǵy XXII halyqaralyq týrnıri óz máresine jetti.
Túrkistan oblysy ákiminiń baspasóz qyzmeti habarlaǵandaı, dúbirli dodada Qazaqstan, Qyrǵyzstan, Ózbekstan, Tájikstan elderinen kelgen jigitter men qyzdardan quralǵan 200-den astam sportshy 19 salmaq dárejesinde synǵa túsip, jeńimpazdar men júldegerlerdi anyqtady.
Jarystyń jabylý saltanatynda Túrkistan oblysy ákiminiń orynbasary Beısenbaı Tájibaev el sportyndaǵy jaryq juldyz – Bekzat Sattarhanov týraly oı qozǵap, chempıonnyń esimi máńgi el esinde qalatynyn aıtty. Sportshylardy marapattady. Sonymen birge Bekzattyń anasy Syrlykúl Sattarhanova men boks ardagerleri de estelikterin aıtyp, jarys júldegerleri men chempıondaryna qurmet kórsetti.
Túrkistan tórindegi boks dodasynda Sattarhanov týrnıriniń júldeleri birneshe óńir men memlekettiń sportshylaryna buıyrdy.
Dálirek aıtsaq, 15 komandanyń ókilderi medal aldy. Beıresmı jalpykomandalyq esepte 13 medal oljalaǵan Túrkistan oblysynyń órenderi birinshi orynǵa shyqsa, ekinshi oryn Almaty qalasynyń boksshylaryna buıyrdy. Úshinshi orynǵa Jambyl oblysynyń sportshylary laıyq dep tanyldy.
Mańǵystaý, Aqtóbe, Almaty oblystary jaqsy nátıje kórsetip, Qyrǵyzstan men Ózbekstan boksshylary da Túrkistannan oljaly qaıtty.
Rıng qojaıyndarynyń nátıjesine toqtalsaq, qyzdar arasynda baq synaǵan 54 kelidegi Lııa Abdýllaeva men 75 kelide Shuǵyla Nálibaı barlyq qarsylastaryn jeńip, altyn medaldi moıyndaryna taqty. Al kúmis júldege qol jetkizgen arýlardyń qatarynda 54 kelide Baǵjan Otynbaı, 60 kelide Toǵjan Ystybaı, 66 kelide Mereı Serikqyzy syndy daryndy sportshylar bar. Sonymen qatar Mereı Tursynbek 57 kelide qola medalǵa qanaǵat etti.
Al erler arasynda Bekzat Sattarhanov aǵasy sııaqty olımpıada chempıony bolýdy armandaıtyn, 57 kelide kúsh synaǵan túrkistandyq jas sportshy Erádil Uzaqbaı aqtyq synda ózbek boksshysyn qapy qaldyryp, altyn medaldiń jeńip aldy. 63,5 kelide Ahmet Úsen de rıng tórinde atoı saldy, jeńimpaz atandy. Sondaı-aq 67 kelide Sultan Turdaly kúmis júldege qol sozdy. 80 kelide el namysyn qorǵaǵan Qýanysh Joldasbek pen +92 kelide judyryqtasqan Muhtarhan Áriphan qola medaldy mise tutty.
Jarys jeńimpazdary men júldegerlerine belbeý, medal jáne dıplomdar tabystaldy.
Dástúrli boks básekesin Túrkistan oblysy ákimdigi, Oblystyq dene shynyqtyrý jáne sport basqarmasy, Ábdisalan Nurmahanov atyndaǵy sport mektebi joǵary dárejede ótkizdi.
