Bekzat Sattarhanov týrnıriniń jeńimpazdary anyqtaldy

TÚRKІSTAN. QazAqparat - Túrkistan qalasynda Sıdneı Olımpıadasynyń chempıony, І dárejeli «Barys» ordeniniń ıegeri Bekzat Sattarhanovty eske alýǵa arnalǵan bokstan halyqaralyq týrnır máresine jetti, dep habarlaıdy QazAqparat tilshisi.

QR Boks federatsııasynyń baspasóz qyzmeti málim etkendeı, osymen 18-shi márte jalaýy jelbiregen halyqaralyq jarysqa Qazaqstan, Reseı, Tájikstan, Qyrǵyzstan, Ózbekstan, Ázerbaıjan memleketterinen kelgen eń tańdaýly boksshylar qatysty. Olar 11 salmaq sanatynda júldelerdi sarapqa saldy.

46 keli salmaqta mańǵystaýlyq Jaras Qomshabaev chempıon atansa, 49 keli salmaqta Almaty oblysynyń ókili Daryn Quljabaevqa teń keler eshkim bolǵan joq. 52 keli salmaq dárejesinde tarazdyq Almaz Dúısenqul top jarsa, 56 keli salmaqta jergilikti boksshy Ashat Tastanbekten eshkim aılasyn asyra almady. Al 60 keli salmaqta shymkenttik Aıdos Jappabergen jeńiske jetse, 64 keli salmaqta Nur-Sultan qalasynan barǵan Ermahan Ótemiske qarsylas shaq kelmedi.

69 keli salmaqta Almaty oblysynyń týmasy Mádı Altynbaevtiń asyǵy alshysynan tússe, 75 keli salmaqta batysqazaqstandyq Marat Qasaev jeńimpaz atandy. 81 keli salmaqta túrkistandyq Baǵdaýlet Qural jeńis tuǵyrynyń eń bıik satysynan kórinse, 91 keli salmaqta shymkenttik Baǵdáýlet Abdýllaevtyń baǵy jandy.

Al asa aýyr salmaqta synǵa túsken boksshylar arasynda shymkenttik Ozodbek Irısmetovtiń mereıi ústem boldy.