Bekzat Sattarhanov týraly fılm jaryqqa shyǵady
«Búginde «Habar» agenttigi boksqa qatysty birneshe avtorlyq jobalardy túsirýdi qolǵa alýda. Atap aıtsaq, Olımpıada chempıony, bizdiń maqtanyshymyz Bekzat Sattarhanov týraly ǵumyrnamalyq tolyqmetrajdy fılm túsirýge daıyndyq jumystary júrip jatyr. Sondaı-aq, jýyrda elimizdiń boks federatsııasynyń 85 jyldyǵyna arnalǵan derekti fılmdi kórsetemiz. Odan bólek, AQSh-ta júrip otanymyzdyń namysyn qorǵap júrgen boksshylar týraly derekti týyndy jasaý da josparda bar», - dedi «Habar» telearnasynyń bas prodıýseri Aıdos Turysbek.
Bas prodıýser atalǵan jobalardy túsirý telearna kórermenderi aldyndaǵy úlken jaýapkershilik ekendigin aıttty.
«Sattarhanovqa qatysty joba 2 tilde túsiriledi. Onda boksshynyń ómirbaıany men úlken sporttaǵy jetken jetistikteri týraly baıandalady. Aldymen 5 bólimnen turatyn serıal retinde túsirý josparlanýda, odan bólek ǵumyrnamalyq tolyq metrajdy fılm túsiriledi. Búginde teletýyndyny túsirýge daıyndyq ıaǵnı, boksshynyń ata-anasymen jáne bapkerlerimen kelissóz jumystary júrip jatyr. Fılmdi tanymal rejısser Murat Bıdosov túsiredi jáne ol óz kórermenderine 2019 jyly jol tartady», - dedi ol.
Sonymen qatar, telearna prodıýseri fılmdi túsirýge elimizdiń tanymal boksshylary keńesshi retinde tartylatynyn jáne onyń negizgi bólimi sportshynyń týǵan jeri Túrkistanda túsiriletinin aıtty.