Bekzat Rahımov: Qoǵam múddesin qozǵaıtyn aqparatty shektep ustaıtyn organdar bar

NUR-SULTAN. QazAqparat – Aqparatqa qol jetkizý másleleri jónindegi komıssııanyń otyrysynda keıbir memlekettik organdardyń qoǵam múddesin qozǵaıtyn aqparatty qyzǵyshtaı qorıtyny aıtyldy, dep habarlaıdy QazAqparat tilshisi.

Memleket basshysyna engiziletin eldegi aqparattyń qoljetimdiligi týraly esep jobasyn tanystyrǵan Bekzat Rahımov saladaǵy táýekelderdi atady.

Memleket pen qoǵam kommýnıkatsııalaryn damytý departamentiniń dırektorynyń sózine qaraǵanda, 2015 jyly qabyldanǵan salalyq zańǵa syn aıtýshylar bar kórinedi.

«Aqparatqa qol jetkizý máselesiniń qaterlerine mynalar jatady. Azamattardyń jeke jáne derbes derekterin qorǵaý talaptary men aqparatqa qol jetkizý talaptarynyń qaıshylyǵy bar. Qoǵam men halyqaralyq uıymdar tarapynan zańnamanyń halyqaralyq standarttarǵa tolyq sáıkes kelmeıtini týraly syn kóp aıtylady. Ásirese ashyqtyq pen táýelsiz baqylaýshy organnyń bolmaýy synǵa ushyraıdy. Aqparatqa jol jetkizý týraly zańdy kózge ilmeý jáne zań talaptaryn saqtamaý, sondaı-aq zańdy saqtaý jónindegi quzyrly komıssııanyń usynymdaryn oryndaý kezinde jasandylyqqa jol berý beleń alǵan. Memlekettik organdar qoǵamnyń múddesin qozǵaıtyn málimetterdi qyzmettik paıdalanýǵa arnalǵan degen jeleýmen shekteýli aqparat sanatyna jatqyzýdy ádetke aınaldyrǵan», - dedi Bekzat Rahımov.