Bekzat Nurdáýletov Qazaqstan chempıonatynda top jardy

NUR-SULTAN. QazAqparat – Shymkent qalasynda bokstan Qazaqstan chempıonatynda tartysty jekpe-jektiń biri 81 kg salmaqta mańǵystaýlyq Bekzat Nurdáýlet pen elordalyq Nurbek Oralbaıdyń arasynda boldy, dep habarlaıdy QazAqparat tilshisi.

B. Nurdáýlet 2019 jylǵy álem chempıony bolsa, 20 jastaǵy qarsylasy da osal emes.

N.Oralbaı jastar arasyndaǵy álem birinshiliginde top jarǵan edi.

Bul básekede bes tóreshi túgeldeı jeńisti Bekzatqa berdi.

B.Nurdáýlet jekpe-jekten keıingi suhbatynda elimizde jas boksshylardyń qaýlap ósip kele jatqanyn jetkizdi.

57 kg salmaqta tartysty jekpe-jekte pavlodarlyq Serik Temirjanov aqmolalyq Orazbek Asylqulovty tóreshilerdiń biraýyzdan sheshimimen jeńdi.

60 kg salmaqta fınalda mańǵystaýlyq Samatáli Tóltaev pen shyǵysqazaqstandyq Beknur Ojanov judyryqtasty. Munda S.Tóltaevtyń mereıi ústem boldy.

Erler arasynda fınaldyq jekpe-jekter odan ári jalǵasýda.

Eske sala keteıik, budan buryn Nazym Qyzaıbaıdyń Tokıo olımpıadasynyń joldamasyn jeńip alǵysy keletinin, áıelder arasynda barlyq chempıondar anyqtalǵanyn jazǵan bolatynbyz.

Sondaı-aq 18 jastaǵy boksshy Azııa chempıonyn utyp ketti.