Bektenovtiń eskertýinen soń iri bıznes bıýdjetke 47 mlrd teńge salyq tólegen

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda jyl basyndaǵy iri kásipkerlerge jasaǵan úndeýi men onyń nátıjesi týraly tilshiler suraǵyna jaýap berdi.

— Bıyl aqpanda siz elimizdegi iri bıznesterge salyq tóleýge eki apta ýaqyt bergen edińiz. Basqasha aıtqanda, salyq mindettemelerin ádil kólemde oryndaýdy talap ettińiz. Búginde bıznes memleket aldyndaǵy mindettemelerin adal oryndap jatyr deýge bola ma?, — dep suraq qoıdy tilshiler. 

— Menińshe, eshkimge qupııa emes, máselen iri qurylys kompanııalary bıznesti bólshekteý shemasyn qoldanady. ıAǵnı, kompanııanyń ózi — bir zańdy tulǵa, al sylaqshy — óz aldyna jeke kásipker (JK), syrlaýshy — bólek JK, kafel tóseýshi — taǵy bir JK. Bul árqaısysynyń jeke-jeke jeńildetilgen salyq rejıminde jumys isteýi úshin jasalady. Sáıkesinshe, olar búkil kompanııanyń ádil salyǵyna qaraǵanda áldeqaıda az tóleıdi. Men jyldyń basynda osy másele týraly málimdegen edim. Bıznes te bul úndeýge qulaq asty dep oılaımyn. Sol úndeýden keıin belsendi jumys júrgizildi, nátıjesinde sanaýly kúnde bıýdjetke 47 mlrd teńge tústi, — dep jaýap berdi O. Bektenov.

Premerdiń aıtýynsha, bul baǵytta Memlekettik kirister komıteti úlken jumys atqaryp jatyr. Blogerlerge qatysty jáne basqa salalarda jumys júrgizildi. 

— Jańa Salyq kodeksi de jeńildetilgen salyq rejımderin qysqartýǵa baǵyttalǵan. Tabys shegi tómendetildi, oǵan qosa bólshek salyq túsinigine saı kelmeıtin qyzmet túrlerin alyp tastaımyz, — dep tolyqtyrdy Úkimet basshysy.

Budan buryn jaýapkershiligi joǵary ınvestorlarǵa qosymsha salyqtyq jeńildikter beriletini belgili boldy.

Sonymen qosa salyq tólemeýdiń qandaı keri saldary bar ekeni aıtyldy.