Bektenovtiń Belarýske sapary: $100 mln-nan astam kelisimshart jasaldy
ASTANA. KAZINFORM — Qazaqstan men Belarýs saýda-ekonomıkalyq yntymaqtastyqty keńeıtip, jalpy quny $100 mln-nan asatyn kelisimsharttarǵa qol qoıdy. Kelisimder ónerkásip kooperatsııasyn damytýǵa, avtokólik pen aýyl sharýashylyǵy ónimderin jetkizýge baǵyttalǵan. Bul týral Saýda jáne ıntegratsııa mınıstrligi málim etti.
— Resmı sapar aıasynda saýda-ekonomıkalyq qatynastardy nyǵaıtý máseleleri talqylandy. 2025 jyly taýar aınalymy shamamen $1,2 mlrd-ty qurady. Bıylǵy jeti aıdyń qorytyndysy boıynsha eksport kólemi 35%-dan astam ósti. Premer-mınıstrdiń sapary barysynda jalpy somasy $100 mln-nan asatyn kelisimsharttar jasaldy. Olardyń qatarynda ónerkásip kooperatsııasy jobalary men Belarýs Respýblıkasyna avtokólik jetkizý jónindegi kelisimder bar. Jalpy, ónerkásip kooperatsııasyna jáne agroónerkásip ónimderin jetkizýge basa nazar aýdaryldy,— dedi saýda jáne ıntegratsııa mınıstri Arman Shaqqalıev.
Atap aıtqanda, «Hyundai Trans Auto» JShS óndirgen 790 kommertsııalyq avtokólikti 2027–2028 jyldary Belarýs elindegi seriktesi — «Er Sı Em» JShQ kompanııasyna jetkizý týraly kelisimshart jasaldy. Olardyń jalpy quny keminde $30 mln-dy quraıdy. Qazaqstandyq avtokólik óndirýshileriniń Belarýs naryǵyna eksporttaýǵa rastalǵan jıyntyq áleýeti jylyna 4,5 myń avtokólikke deıin jetedi. Sondaı-aq qazaqstandyq sýsyndar men ózge de ónimderdi jetkizý jóninde ýaǵdalastyqtarǵa qol jetkizildi.
