JІÓ-ni 450 mlrd dollarǵa jetkizý órshil, biraq múmkin mindet — Úkimet basshysy

ASTANA. KAZINFORM — Premer-mınıstr Oljas Bektenov Úkimet otyrysynan keıin ótip jatqan baspasóz máslıhatynda 2029 jylǵa deıin jalpy ishki ónimdi 450 mlrd dollarǵa jetkizý týraly Prezıdent tapsyrmasyn oryndaý qanshalyqty múmkin ekeni týraly pikir bildirdi.

— Bizdiń oıymyzsha, bul - órshil mindet. Biraq qol jetkizýge bolady. Byltyr jalpy ishki ónimniń kólemi 286 mlrd dollar boldy. Bıyl ekonomıkanyń ósý kórsetkishterin eskersek, 300 mlrd dollarǵa jetkizý týraly mejege úmit artyp otyrmyz. Ekonomıkany qarqynmen ósýin qamtamasyz ete alsaq, 450 mlrd dollardyń mejesin baǵyndyrýǵa tolyqtaı bolady, — dedi ol jýrnalıst suraǵyna bergen jaýabynda.

Sondaı-aq Úkimet basshysy bul úshin eldiń ónerkásip áleýetin arttyrý, ekonomıkany ártaraptandyrý, joǵary bólinistegi óndiristi damytý baǵyttarynda úlken jumys júrip jatqanyn aıtty.

— «Báıterek» holdıngi arqyly qomaqty qarajat qarastyrylǵanyn talaı ret aıttyq. Bul bıyldyń ózinde ekonomıkaǵa 8 trln teńgeden astam qarajat bólýge múmkindik beredi, — dedi Premer-mınıstr.

Aıta ketsek, búgingi Úkimet otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet otyrysynda jyldyń 6 aıynda el ekonomıkasy 6,2 paıyz ósim kórsetkenin málim etken edi.