Bektenov Jezqazǵan qalasynyń sý tazartý qondyrǵysyn jóndeý úshin qosymsha qarjylandyrýdy tapsyrdy
ASTANA. KAZINFORM – 2025 jyldyń 6 aıynda memlekettik organdarǵa sýmen jabdyqtaý máseleleri boıynsha turǵyndardan 30 myńǵa jýyq aryz-shaǵym kelip túsken. Bul týraly Úkimet otyrysynda Premer-mınıstr Oljas Bektenov aıtty.

- Mańǵystaý oblysyndaǵy Kendirli sý tuşytý zaýytynyń iske qosylýy da uzaqqa sozylyp ketti. «Samuryq-Qazyna» qory men Mańǵystaý oblysynyń ákimdigine 15 shildege deıin Kendirli zaýytyn iske qosý jumystaryn aıaqtap, Jańaózen qalasyna sý berýdi qamtamasyz etýdi tapsyramyn. Jezqazǵan qalasynyń turǵyndarynan aýyz sýdyń sapasyna qatysty shaǵymdar kelip túsip jatyr. Ondaǵy sý tazartý qondyrǵysyna kúrdeli jóndeý jumystarynyń júrgizilip jatqanyna 10 jyldan asty. Qarjy jáne Ónerkásip mınıstrlikterine Ulytaý oblysynyń ákimdigimen birlesip, osy jyldyń 1 tamyzyna deıin atalǵan jobany qosymsha qarjylandyrý týraly sheshim qabyldaýdy tapsyramyn, - dedi Premer-mınıstr.
Úkimet basshysynyń dereginshe, tek birinshi jarty jyldyqtyń ózinde memlekettik organdarǵa sýmen jabdyqtaý máseleleri boıynsha turǵyndardan 30 myńǵa jýyq aryz-shaǵym kelip túsken.
- Ónerkásip jáne Sý resýrstary mınıstrlikteri men óńir ákimdikterine keshigip jatqan jobalardy tolyq aıaqtaý úshin túbegeıli sharalar qabyldaýdy tapsyramyn. Sýmen jabdyqtaý júıelerin damytýmen qatar únemdeý tehnologııalaryn engizý jáne sý resýrstaryn basqarýdy tsıfrlandyrý jumysyn kúsheıtý qajet. Sýmen jabdyqtaý jelileriniń tozý deńgeıin odan ári tómendetý kerek. Eskirgen kommýnaldyq ınfraqurylymdy barynsha jańǵyrtyp, jańalaryn salýǵa mańyz berilýge tıis. Bul másele qabyldanǵan «Energetıkalyq jáne kommýnaldyq sektorlardy jańǵyrtý» ulttyq jobasyn iske asyrý aıasynda da sheshimin tabady, - dedi Oljas Bektenov.
Buǵan deıin Oljas Bektenov iske asyrylý merzimi sozylyp ketken taza aýyz sý jobalaryn ataǵan edi.