BQO-da sý tasqynynan zardap shekken otbasylar úshin 889 úı salyndy
ORAL. KAZINFORM – Oljas Bektenov BQO-ǵa jumys sapary aıasynda abattandyrý jónindegi Prezıdent tapsyrmalarynyń oryndalý barysymen tanysty. Bul týraly Úkimettiń baspasóz qyzmeti habarlady.
Oral qalasynda Premer-mınıstr Oljas Bektenov Memleket basshysynyń ınfraqurylymdy damytý jáne abattandyrý, sondaı-aq sý tasqynynyń aldyn alý sharalary jónindegi tapsyrmalarynyń oryndalý barysymen tanysty. Atap aıtqanda, 2024 jylǵy sý tasqynynan zardap shekken otbasylar úshin salynǵan úılerdi jáne Jaıyq ózeniniń boıyndaǵy jaǵalaýdy nyǵaıtý jumystarynyń nátıjesin kórdi.
Batys Qazaqstan oblysynda sý tasqynynan zardap shekken otbasylar úshin barlyǵy 889 úı salyndy, onyń ishinde Oral qalasynda — 451 turǵyn úı. Qurylys jumystary 2024 jyldyń qyrkúıeginde tolyǵymen aıaqtalyp, otbasylarǵa berildi. Búgingi tańda barlyq úıler qajetti ınjenerlik ınfraqurylymmen qamtamasyz etilgen.
Sondaı-aq Premer-mınıstr Jaıyq ózeniniń boıyndaǵy jaǵalaýdy nyǵaıtý jáne rekonstrýktsııalaý jumystarymen tanysty. Ózenniń jaǵalaýy men arnasyn, turǵyn úılerdi tasqynnan qorǵaý úshin uzyndyǵy 383,6 metr bóget salyndy. Jalpy, eldi mekenderdi sý tasqynynan qorǵaý úshin oblysta 143 shaqyrym qorǵanys bógetteri, 9 shaqyrym sý burý kanaldary salyndy, 74 shaqyrym magıstraldy kanaldar tazartyldy.
Jaǵalaýdy rekonstrýktsııalaý osy jyldyń mamyr-qyrkúıek aılary aralyǵynda júrgizildi. Jobaǵa sáıkes, sý tasqynynan qorǵaý maqsatynda ózen jaǵalaýy burynǵydan da bıiktetildi. Barlyq aýmaq tolyǵymen abattandyrylyp, qorshaýlar ornatyldy.
8 myń sharshy metr alańǵa trotýarlar tóseldi, 102 kóshe shamdary ornatyldy, 16 myń sharshy metrden astam kógal men 768 aǵash kóshetteri otyrǵyzyldy. Balalar oıyn alańy, sport alańy, vorkaýt-aımaq jáne taǵy da basqa nysandar rekonstrýktsııalandy.
Aıta ketelik Oljas Bektenov BQO-daǵy munaı-gaz ken oryndaryn teksergen edi.