Bektenov: Jasandy ıntellekt tehnologııalaryn damytý — Úkimettiń basty mindeti
ASTANA. KAZINFORM – Premer-mınıstrge AI Kitap jáne OlympIQ jobalaryn pılottyq rejımde engizý qarastyrylatyn mektepter men sport federatsııalarynyń tizbesi jasalǵany týraly aıtyldy. Bul týraly Úkimettiń baspasóz qyzmeti habarlady.
Oljas Bektenov Qazaqstandyq IT-mamandarmen áleýmettik saladaǵy jáne ónerkásiptegi startaptardy talqylady
Premer-mınıstr Oljas Bektenov Qazaqstandyq IT-kompanııalardyń ókilderimen Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda qoıylǵan mindetter sheńberinde bilim berý, sport jáne ónerkásip salalaryndaǵy JI-startaptardy qoldaý máselelerin talqylady.
Otandyq Paradigm Shift (CodiPlay) kompanııasynyń ókilderi jańa jobalardyń júzege asyrylý barysy týraly aıtyp berdi:
AI Kitap — bul mektep pánderi boıynsha ár oqýshynyń deńgeıine qaraı oqý materıalyn laıyqtaýǵa arnalǵan, progreske taldaý jasaıtyn jáne bilimdegi olqylyqtardy anyqtaıtyn tsıfrlyq oqýlyq. Onyń jumys nusqasy ázirlendi, AI Kitap AITU-men ıntegratsııalanyp jatyr.
OlympIQ — sportty damytýǵa arnalǵan tehnologııalyq platforma. Júıe analıtıkalyq, operatsııalyq, medıtsınalyq jáne uıymdastyrýshylyq derekterdi jasandy ıntellekt arqyly óńdeýge múmkindik beredi. Onyń jol kartasy ázirlendi, prototıpterdiń alǵashqy nusqalary daıyndaldy.
Premer-mınıstrge AI Kitap jáne OlympIQ jobalaryn pılottyq rejımde engizý qarastyrylatyn mektepter men sport federatsııalarynyń tizbesi jasalǵany týraly habarlandy.
— Jasandy ıntellekt tehnologııalaryn damytý — Úkimettiń basty mindeti. Biz otandyq kompanııalardyń ónimderin jan-jaqty qoldaýǵa daıynbyz, — dep atap ótti Oljas Bektenov.
Sondaı-aq kezdesýde kompanııanyń óndiristik úderisterdi ońtaılandyrýǵa, energetıka jáne kólik salalarynyń tıimdiligin arttyrýǵa, operatsııalyq shyǵyndardy azaıtýǵa jáne táýekelderdi basqarýǵa kómektesetin tehnologııalardy jasap shyǵarý bastamalary qaraldy. Onyń ónimderine mańyzdy salalarǵa engizilgen derekterdi taldaý, boljaý jáne avtomattandyrýdyń ıntellektýaldy júıeleri kiredi.
Kezdesý qorytyndysy boıynsha ýákiletti organdarǵa IT-mamandardyń aıtqan usynystaryn qarastyrý tapsyryldy.
Aıta ketelik memorgandarǵa jeke mobıldi qosymshalar ázirleýge tyıym salynatyny týraly jazǵan edik.