Bektenov jańadan taǵaıyndalǵan mınıstrlerdi tanystyrdy
ASTANA. KAZINFORM — Qazaqstan Premer-mınıstri Oljas Bektenov Ekologııa jáne tabıǵı resýrstar, Tótenshe jaǵdaılar, Mádenıet jáne aqparat mınıstrlikteriniń ujymdaryna Memleket basshysynyń Jarlyǵymen taǵaıyndalǵan jańa basshylardy tanystyrdy.
Úkimet jetekshisi jańadan taǵaıyndalǵan ekologııa jáne tabıǵı resýrstar mınıstrin tanystyrý barysynda Erlan Nysanbaevqa atqarǵan jumysy men ekologııalyq mádenıet qalyptastyrýǵa jáne qorshaǵan ortany qorǵaýǵa qosqan úlesi úshin alǵys bildirdi.
Premer-mınıstr Oljas Bektenov Álibek Qýantyrovtyń memlekettik qyzmettegi mol tájirıbesin atap ótip, Prezıdenttiń mınıstrlik aldyna qoıǵan mindetterin aıqyndady. Atap aıtqanda, Memleket basshysy Qasym-Jomart Toqaevtyń «Taza Qazaqstan» bastamasyn odan ári tıimdi júzege asyrýdy jalǵastyrýdyń mańyzdylyǵyna toqtaldy.
Memleket basshysynyń orman alqaptaryn odan ári qalpyna keltirý, qaldyqtardy qaıta óńdeý jáne ulttyq parkterdiń ınfraqurylymy arqyly tuıyq tsıkldy ekonomıkany damytý jónindegi tapsyrmalaryn tolyqtaı oryndaý qajettigi atap ótildi. Astana, Almaty jáne Shymkent qalalarynda qaldyqtardy energetıkalyq kádege jaratý zaýyttaryn salý boıynsha jobalar erekshe baqylaýda bolýy tıis, keıinnen mundaı tájirıbeni basqa óńirlerge de keńinen taratý qajet.
Premer-mınıstr Tótenshe jaǵdaılar mınıstrliginiń ujymyna jańa mınıstr Murat Muhanovty tanystyrdy. Oljas Bektenov mınıstr laýazymynda atqarǵan jumysy úshin Shyńǵys Árinovke alǵysyn bildirip, ary qaraıǵy kásibı qyzmetine tabys tiledi.
TJM ujymy men jańa mınıstrdiń aldyndaǵy halyq pen elimizdiń aýmaqtaryn tótenshe jaǵdaılardan qorǵaýdy qamtamasyz etý boıynsha mindetter qoıyldy. Oljas Bektenov azamattyq qorǵanys júıesiniń tıimdiligin arttyrý jumystaryn jalǵastyrýdy, tabıǵı jáne tehnogendik sıpattaǵy tótenshe jaǵdaılarǵa qarsy áreket etý deńgeıin arttyrýdy, qutqarý bólimshelerin materıaldyq-tehnıkalyq jaǵynan jaraqtandyrý barysyn odan ári nyǵaıtý jóninde sharalar qabyldaýdy tapsyrdy.
Premer-mınıstr Mádenıet jáne aqparat mınıstrliginiń jańa basshysy Arman Qyryqbaevty tanystyrý barysynda Aıda Balaevaǵa jemisti jumysy úshin alǵys aıtyp, oǵan Qaýipsizdik Keńesindegi jańa qyzmetine tabys tiledi.
Premer-mınıstr Arman Qyryqbaevtyń ortalyq jáne óńirlik deńgeıde mádenıet, Aqparat jáne ishki saıasat salasyndaǵy eleýli jumys tájirıbesin atap ótip, Prezıdenttiń jańa basshy bastaǵan mınıstrlik ujymynyń aldyna qoıǵan mindetterin aıtty.
Premer-mınıstr memlekettiń azamattyq qoǵammen ózara syndarly is-qımylyn damytý jónindegi júıeli jumystyń mańyzdylyǵyn atap ótti. Halyqtyń suranysy men qajettilikterin eskere otyryp, memlekettik jastar jáne otbasy saıasatyn júzege asyrý boıynsha keshendi sharalar uıymdastyrýǵa nazar aýdarý kerek. Sondaı-aq etnosaralyq jáne konfessııaaralyq kelisimdi nyǵaıtý jumystaryn júıeli úılestirýdi qamtamasyz etý qajet.
Eske salaıyq, buǵan deıin Premer-mınıstr orynbasarlary men mınıstrler tolyqtaı taǵaıyndalyp, Úkimettiń jańa quramy belgili boldy. Mınıstrlerdiń basym bóligi qyzmetinde qaldy. Degenmen, keı salalardyń mınıstrleri aýysty. Úkimet quramyndaǵy aýys-túıis týraly myna jerden oqı alasyz.
