Bektenov zań jobasyn engizý merziminiń keshiktirilýi jaıynda: Mundaıdy doǵarý qajet
ASTANA. KAZINFORM — Memlekettik organdardyń birinshi basshylary zań jobalaý jumystary josparynyń ýaqtyly iske asyrylýyn tikeleı baqylaýda ustaýǵa tıis. Bul týraly búgin Úkimet otyrysynda Premer-mınıstr Oljas Bektenov aıtty.
- Bıyl mańyzdy zańnamalyq bastamalar qabyldandy. Medıtsınalyq saqtandyrý, quqyq buzýshylyq profılaktıkasy, balamaly energetıkany damytý, ınvestıtsııalyq qorlardy retteý jáne basqa da mańyzdy baǵyttar boıynsha birqatar zań jobasy ázirlenip, Parlament qaraýyna engizildi. Atap aıtqanda, mindetti áleýmettik medıtsınalyq saqtandyrýǵa qatysty qabyldanǵan sharalar ár azamat úshin qoljetimdi ári sapaly medıtsınalyq qyzmet kórsetýge múmkindik beredi. Investıtsııalyq qorlar týraly jańa zań jobasynyń erejeleri kapıtal naryǵyn odan ári tıimdi damytýǵa yqpal etedi. Sonymen qatar belgilengen merzimderdiń saqtalýyna qatysty máseleler de bar. Mysaly, densaýlyq saqtaý týraly zań jobasyn Úkimetke engizý merziminen 30 kúnge keshiktirildi. Mundaıdy doǵarý qajet, - dedi Úkimet basshysy.
Osy rette ol memlekettik organdardyń birinshi basshylary zań jobalaý jumystary josparynyń ýaqtyly iske asyrylýyn tikeleı baqylaýda ustaýǵa tıistigin basa aıtty.
- Sondaı-aq birqatar jobaǵa Úkimet Apparaty men Prezıdent Ákimshiliginiń eskertýlerinen keıin kóp ózgerister engizilip, qaıta pysyqtalady. Jalpy alǵanda, osy jylǵa arnalǵan zań jobalary Parlament qaraýyna engizildi. Demek, jospar oryndaldy dep sanaýǵa bolady. Úkimet 2026 jyly zań shyǵarý jumysynyń ekonomıka men áleýmettik salanyń mańyzdy aspektilerine qatysty negizgi baǵyttaryna basa mán beretin bolady. Sonyń biri – memlekettik múlikti basqarýdy odan ári jetildirý. Memlekettiń ekonomıkaǵa qatysý shegin naqty aıqyndap, basqarý isine qatysty quqyqtyq talaptardy bekitip alý qajet. Biz jumyskerlerdiń quqyqtaryn qorǵaý jáne áleýmettik qamsyzdandyrý júıesin nyǵaıtý úshin normatıvtik bazany jetildirý baǵytynda belsendi jumysty jalǵastyramyz. Sondaı-aq munaı-gaz hımııasy ónerkásibin damytýdyń júıeli ári keshendi tásilin qamtamasyz etetin zańnamalyq bastamalar bar, - dedi Oljas Bektenov.
Buǵan deıin Úkimettiń bıylǵy zań jobalaý jospary oryndalǵanyn jazǵan edik.
