Bektenov úsh qaladaǵy jańa JEO týraly: Reseı jaýabyn sozsa, ózimiz salamyz

ASTANA. KAZINFORM – Premer-mınıstr Oljas Bektenov Úkimet otyrysynan keıin ótip jatqan baspasóz máslıhatynda Óskemen, Semeı, Kókshetaý qalalarynda salynýǵa tıis úsh jylý-elektr ortalyǵynyń taǵdyry ne bolatynyn aıtty.

- Úsh JEO boıynsha bastapqyda reseılik seriktestermen birge iske asyrý múmkindigi qarastyryldy. Ázirge biz Reseı Federatsııasynan kepildendirilgen, arzandatylǵan qarjylandyrý usynystary týraly naqty aqparat alǵan joqpyz. Sondyqtan biz Kókshetaýdy óz kúshimizben sala bastadyq. «Samuryq-Energo» da aınalysyp jatyr. Semeı men Óskemendi aıtsaq, Reseı tarabynan jaýap kútip otyrmyz. Eger jaýap jaqyn arada bolmasa, jobany óz betimizben iske asyrýdyń nusqalaryn da qarastyramyz. Biz kúte almaımyz, - dedi Premer-mınıstr.

Jýrnalıst úsh birdeı iri jobany Qazaqstan bıýdjeti kótere ala ma dep naqtylady.

- Kóteremiz. «Samuryq-Energonyń» naryq mehanızmderi bar. Jylý-elektr ortalyǵy da bıznes joba. Paıdalanýǵa berilgennen keıin aqsha taýyp, salǵan ınvestıtsııasyn qaıtarady, - dedi Oljas Bektenov.

Buǵan deıin Energetıka mınıstri Erlan Aqkenjenov 18-25 maýsymda ótken Peterbor ekonomıkalyq forýmynda osy másele talqylanatynyn aıtqan bolatyn.