Bektenov: Úkimet azyq-túlikke arnalǵan marketpleıs ázirleýi kerek

ASTANA. KAZINFORM – Premer-mınıstr Oljas Bektenov azyq-túlik baǵasyn turaqtandyrý úshin memlekettik marketpleıs ázirleýdi tapsyrdy. Bul tapsyrma Úkimettiń 6 aıdaǵy jumys qorytyndysy talqylanǵan otyrysta berildi.

2028 jyly áýemen júk tasymaldaý kólemi 2 ese ósedi

Áýeli ol el ekonomıkasyna tartylǵan ınvestıtsııalardyń mańyzyna toqtaldy.

- Bir ǵana mysal – Memleket basshysy óńirimizdegi (Ortalyq Azııadaǵy – red.) tuńǵysh sýperkompıýter klasterin iske qosty. 

Ony qoldaný tsıfrlandyrýdyń aýqymynk keńeıtip, ashyqtyqty arttyrady, kóptegen ekonomıkalyq máselelerdi jedel sheshýge múmkindik beredi, - dedi Úkimet basshysy.

Premer-mınıstr ekonomıkanyń 6 paıyzdyq ósimin ornyqtyra túsý úshin jasalý kerek sharýalardy atady.

- Óńirlik ınvestıtsııalyq shtabtardyń alańyn belsendi paıdalanǵan jón. Joǵary tehnologııalyq ónimderdiń eksportyna baǵdarlanǵan jobalarǵa basa nazar aýdarý qajet. 

Óńdeý ónerkásibi turaqty ósý úshin otandyq kásiporyndarǵa uzaq merzimdi tapsyrystar berip, óndiristik júktemesin arttyrý kerek. Múddeli memlekettik organdar óńdeýge arnalǵan shıkizattyń tasymalyn jan-jaqty pysyqtaýǵa tıis, - dedi Oljas Bektenov.

Úkimet basshysy jer-jerdegi arnaıy ekonomıkalyq jáne ındýstrııalyq aımaqtardyń logıstıka máselesin jedeldetip retteýdi tapsyrdy. Bul jobalarǵa halyqaralyq qarjy uıymdarynyń qarajatyn neǵurlym belsendi tartý kerektigin de aıtty.

Qazaqstannyń tranzıttik áleýeti tıisti deńgeıde paıda asyrylmaı jatqany da sóz boldy. Ásirese kólik dálizderiniń ótkizý qabiletin tezdetip arttyrý qajettigi týyndap otyr.

- Aldaǵy jyldary 3 myń shaqyrymnan astam joldy kúrdeli jóndeý, ótkizý beketterin jańǵyrtý, Qazaqstan arqyly ótetin temirjol dáliziniń boıynda qolǵa alynǵan jańa jobalardy iske asyrý, halyqaralyq avıahabtar qurý jumystary basty nazarda bolýǵa tıis. 

Bul sharalar 2028-shi jylǵa qaraı áýe kóligimen júk tasymaldaý kólemin 2 ese, 2027-shi jylǵa qaraı temirjol tranzıtin 2 ese arttyrýǵa múmkindik beredi, - dedi Premer-mınıstr.

Azy-túlik qaýipsizdigi, arnaıy marketpleıs

Oljas Bektenovtiń paıymdaýynsha saýda salasynyń bolashaǵy osy sektordyń qanshalyqty tsıfrlanǵanyna baılanysty bolmaq.

- Bul ishki saýda kólemin keńeıtip qana qoımaı, otandyq ónimniń syrtqy naryqtarǵa shyǵýyna jol ashady. Múddeli memlekettik organdarǵa arnaıy agrarlyq azyq-túlik marketpleısin qurý boıynsha usynystar engizýdi tapsyramyn, - dedi ol.

Al munaı-gaz salasynda Teńiz ken ornyndaǵy Bolashaq keńeıtý jobasyn jáne Uńǵyma erneýiniń qysymyn basqarý jobasyn aıaqtaý tapsyryldy. Gaz óńdeý zaýyttarynyń qurylysyn da erte bastap, ýaqtyly aıaqtaý kerektigi aıtyldy. 

Úkimet pen ákimdikter úshin baǵany turaqtandyrý basym baǵyt bola beretinin eske salǵan Premer-mınıstr óńir basshylaryna deldaldyq shemalardy anyqtaý jumystaryn kúsheıtýdi tapsyrdy.

- Áleýmettik mańyzy bar azyq-túlik taýarlaryn óndirýge arnalǵan basym daqyldardyń egis alqaptaryn ulǵaıtý kerek. 

Jalpy ortalyq jáne jergilikti atqarýshy organdarǵa ınflıatsııany baqylaý men tómendetý jónindegi is-sharalar kesheniniń sapaly oryndalýyn qamtamasyz etýdi tapsyramyn, - dep túıindedi Úkimet basshysy.

Aıta keteıik, ıAndekste jumys isteıtin 87 myń qazaqstandyq áleýmettik turǵyda qorǵaldy.