Bektenov Túrkistan oblysynyń sý sharýashylyǵy ınfraqurylymynyń nysandaryn tekserdi
TÚRKІSTAN. KAZINFORM – Túrkistan oblysyna jumys sapary barysynda Premer-mınıstr sý qoımalarynyń jaı-kúıimen, gıdrotehnıkalyq qurylystardy qaıta jańǵyrtý jumystarynyń barysymen jáne ońtústik óńirlerdi turaqty sýmen qamtamasyz etý boıynsha atqarylyp jatqan sharalarmen tanysty.
Oljas Bektenov «Shardara» sý qoımasy men «Kóksaraı» sý rettegish nysanyn baryp kórdi.
«Qazgıdromet» RMK-nyń málimeti boıynsha, elimizdiń ońtústik óńirlerindegi bıylǵy vegetatsııa maýsymynda jaýyn-shashyn tapshy bolyp tur. Dúnıejúzilik meteorologııalyq uıym men Soltústik Eýrazııalyq klımat ortalyǵynyń boljamdarynda gıdrologııalyq qurǵaqshylyqtyń yqtımaldyǵy joǵary. Bul aýyl sharýashylyǵyna qater týdyryp otyr, ásirese Syrdarııa ózeni basseıni boıynda qurǵaq aýa raıy uzaq ýaqyt saqtalar bolsa, keıbir jerlerde egin qýrap ketýi múmkin.
Sý berýdi ońtaılandyrý jónindegi ishki sharalarmen qatar, Úkimet Syrdarııa ózeniniń joǵary jaǵynda ornalasqan kórshiles memlekettermen Ortalyq Azııanyń memleketaralyq sý sharýashylyǵyn úılestirý komıssııasy aıasynda kelissózder júrgizýde. Qol jetkizilgen kelisimder sýdy ýaqtyly alýǵa múmkindik beredi.
Shardara sý qoımasynyń jumysymen tanysý kezinde Premer-mınıstrge nysannyń jaǵdaıy men ońtústik óńirlerdegi sýarý jumystary týraly baıandaldy. Bul — Túrkistan jáne Qyzylorda oblystaryndaǵy aýyl sharýashylyǵy alqaptaryn sýarmaly sýmen, sondaı-aq Shardara qalasynyń turǵyndaryn aýyz sýmen qamtamasyz etetin negizgi sý nysany.
Oljas Bektenov sýdy bólýde ashyqtyqty qamtamasyz etý úshin qadaǵalaýdy kúsheıtý qajettigin aıtty.
– Agroónerkásip kesheni — ekonomıkanyń negizgi sektorlarynyń biri. Qazirgi jaǵdaıda sý resýrstaryn qajetine qaraı jáne qatań qadaǵalaı otyryp bólý erekshe mańyzǵa ıe. Qadaǵalaýdy barlyq deńgeıde kúsheıtip, sý bólýdi ashyq etý qajet, - dep atap ótti Premer-mınıstr.
Osy turǵyda Premer-mınıstrdiń orynbasary Qanat Bozymbaevqa kórshiles eldermen sý berý rejımderin kelisý jáne týyndaǵan máselelerge jedel den qoıý, sonyń ishinde turǵyndardy aýyz sýmen qamtamasyz etý boıynsha jumystardy úılestirý tapsyryldy.
«Kóksaraı» sý rettegish nysanyn tekserý qorytyndysynda Premer-mınıstr Sý resýrstary jáne ırrıgatsııa mınıstrligine kontrrettegishtiń tolyq qýatynda jumys isteýin qalpyna keltirý maqsatynda rekonstrýktsııalaý jumystaryn jedeldetýdi tapsyrdy. Bul ózen aǵynyn qajetine qaraı retteý jáne ońtústik óńirlerdegi sharýalardy turaqty sýmen qamtamasyz etý úshin qajet.
Oljas Bektenov transshekaralyq sý kózderinen keletin sý kóleminiń azaıýyna baılanysty Úkimet ishki sý qoryn damytýǵa basymdyq berip otyrǵanyn atap ótti.
– Memleket basshysy kóktemgi jáne erigen qar sýyn jınap, ony egistikke tıimdi paıdalaný úshin 20 jańa bógen salý, keminde 15 sý qoımasyna kúrdeli jóndeý júrgizý jóninde tapsyrma bergen bolatyn. Taıaý ýaqytta „Báıdibek ata“ jáne „Boraldaı“ sý qoımalary arqyly „Bógen“ sý qoımasyna qosymsha 113 mln tekshe metr sý berilgeniniń arqasynda Túrkistan qalasy kepildi túrde sýmen qamtamasyz etiletin bolady. Transshekaralyq sý kózderinen keletin sý kólemi jyldan-jylǵa azaıyp keledi. Soǵan baılanysty biz ishki sý qorlaryn barynsha paıdalaný úshin qosymsha sý qoımalaryn salý joldaryn qarastyrýymyz qajet, - dep atap ótti Oljas Bektenov.
Premer-mınıstr Sý resýrstary jáne ırrıgatsııa mınıstrligine Túrkistan oblysynyń ákimdigimen birlesip, óńirdegi sý sharýashylyǵy jobalaryn ýaqtyly qarjylandyrýdy jáne júzege asyrýdy tapsyrdy.
Eske sala keteıik, buǵan deıin Úkimet úıinde ótken baspasóz máslıhatynda Premer-mınıstrdiń orynbasary Roman Sklıar kommýnaldyq qyzmetter tarıfi kóterilgenimen kúrt artý bolmaıtynyn aıtqan edi.