Bektenov Túrkistan oblysynda salynyp jatqan elektr stansasynyń qurylysyn tekserdi

Premer-mınıstr Oljas Bektenov Túrkistan oblysynda qýaty 1000 MVt bolatyn bý-gaz qondyrǵysy (BGQ) bazasynda salynyp jatqan elektr stansasynyń qurylysyn tekserdi. Memleket basshysynyń tapsyrmasy boıynsha júzege asyrylyp jatqan joba Ulttyq elektr jelisiniń turaqty jumys isteýin qamtamasyz etýge baǵyttalǵan.

Saıram aýdanynda Oljas Bektenov elimizdegi eń iri gaz elektr stansasynyń qurylysy boıynsha júrgizilip jatqan jumystarmen tanysty. Joba jalpy qýaty 1000 MVt bolatyn 4 gaz týrbınasy, 4 kádege jaratý qazandyǵy jáne 2 bý týrbınasyn qamtıdy. Qoldanylyp otyrǵan bý-gaz qondyrǵysy tehnologııasy paıdalanylǵan gaz jylýyn iske asyryp qosymsha elektr energııasyn óndirýge múmkindik beredi jáne zamanaýı jylý energetıkasyndaǵy eń tıimdi ári ekologııalyq taza tehnologııalardyń biri sanalady. Stansanyń artyqshylyǵy – onyń joǵary manevrli qabiletinde jáne jelide tapshylyq týyndaǵan jaǵdaıda jetispeıtin qýatty jedel túrde tolyqtyrý múmkindiginde.

«Memleket basshysy Ulttyq quryltaı otyrysynda jańa qýat kózderin iske qosý búgingideı energııany kóp qajet etetin ekonomıkany damytý úshin tıisti shart ekenin atap ótti. Tirshilikke qajetti júıelerdiń turaqty jumysyn qamtamasyz etý jáne ornyqty energetıkalyq bazany qalyptastyrý – Úkimettiń negizgi mindetteriniń biri.

Túrkistan oblysynyń qarqyndy damyp kele jatqanyn kórip otyrmyz, óńirdiń ónerkásipte, aýyl sharýashylyǵynda áleýeti joǵary. BGQ jobasyn júzege asyrý ońtústik óńirge qosymsha qýat rezervin qurýǵa jáne energııa júıesiniń turaqtylyǵyn nyǵaıtýǵa múmkindik beredi. Salynyp jatqan stantsııa óńirdiń odan ári áleýmettik-ekonomıkalyq damýynyń mańyzdy elementine aınalyp, jańa ınvestıtsııalyq jobalardy júzege asyrýǵa negiz bolady», - dep atap ótti Oljas Bektenov.

Premer-mınıstrge jobanyń aǵymdaǵy jaǵdaıy týraly baıandaldy. «Túrkistan BGQ» JShS («Samuryq-Qazyna» AQ-nyń enshiles uıymy) basqarma tóraǵasy Ulan Búrkitov nysandy 2026 jyldyń sońyna deıin iske qosý josparlanyp otyrǵanyn habarlady. Búgingi tańda negizgi nysandardyń, onyń ishinde bas ǵımarat pen taratý qurylǵylarynyń irgetastary daıyn. Bas ǵımarattaǵy jobada kórsetilgen oryndarǵa generatorlary bar tórt gaz týrbınasy (Siemens Energy) ornatylǵan.

Jobanyń bas merdigeri – qazaqstandyq jáne ońtústik koreıalyq kompanııalardan qurylǵan konsortsıým. Qurylys alańynda 1 myńnan astam adam jáne 150 birlik mamandandyrylǵan tehnıka jumyldyrylǵan. Tiginen qurastyrylatyn qurylys nysandary salynýda: ǵımarattardyń qańqalary montajdalyp, metall konstrýktsııalar ornatylýda, qabyrǵalar qaptalyp jáne taǵy da basqa jumystar júrgizilip jatyr. Elektr stansasynyń negizgi tehnologııalyq jabdyqtary tolyq kólemde jetkizilgen. Joba iske qosylǵan soń 600-den astam turaqty jumys oryny ashylady.

Qazirgi ýaqytta Túrkistan oblysy boıynsha elektr energııasyn tutynýdyń ortasha kólemi 445 MVt-ty quraıdy, al ishki generatsııa kólemi 136,5 MVt deńgeıinde. Stansany iske qosý óńirdegi qýat tapshylyǵyn tolyǵymen jabýǵa jáne eń joǵary júktemeler kezeńinde energııa júıesiniń turaqtylyǵyn qamtamasyz etýge múmkindik beredi.

Energetıka mınıstrliginiń derekterine sáıkes, Qazaqstanda ótken jyly 123,1 mlrd kVt·saǵ elektr energııasy óndirildi (2024 jyly – 117,9 mlrd kVt·saǵ). «Tekeli energokesheni» JShS-da úsh gaz týrbınalyq qondyrǵynyń qurylysyn aıaqtaý jáne «Topar basty energııa taratý stansasy» JShS-da eskirgen týrboagregatty aýystyrý qosymsha 166 MVt qýat óndirýge múmkindik berdi. Bıyl jańa generatsııany iske qosý arqyly 1980 MVt elektr energııasyn qamtamasyz etý jáne almastyrý aıasynda 683 MVt qýat engizý josparlanyp otyr.

Premer-mınıstr Energetıka mınıstrligine «Samruk-Kazyna Construction» AQ-men birlesip, barlyq tórt gaz týrbınasyn iske qosý merzimderin saqtaı otyryp, ekologııalyq talaptardy oryndaýdy jáne jelilik ınfraqurylymmen úılestirýdi qamtamasyz ete otyryp, bý-gaz elektr stansasyn salý jobasyn ýaqtyly júzege asyrýdy tapsyrdy.

Aıta keteıik, Úkimet Qazaqstanda kómir generatsııasyn damytý jónindegi Ulttyq jobany bekitti.