Bektenov týrısterge kelgen sátten bastap, ketkenge deıin qolaıly jaǵdaı jasaýdy tapsyrdy

ASTANA. KAZINFORM – QR Premer-mınıstri Oljas Bektenov týrıster úshin kelgen sátten bastap, búkil sapar marshrýty boıynsha jáne elden ketkenge deıin qolaıly jaǵdaı jasaýdy tapsyrdy. Bul týraly Úkimettiń baspasóz qyzmeti málim etti.

Úkimet otyrysynda QR Premer-mınıstri Oljas Bektenov qonaq úıler men týrıster jıi baratyn basqa da oryndarda qyzmet kórsetý sapasy men qaýipsizdik deńgeıiniń joǵary bolýy qajettigin atap ótti. 

Premer-mınıstr týrıstik ónimderdi naqty týrıstik toptardyń, ásirese, shekaralas óńirlerdegitýrısterge beıimdegen jón ekenin basa aıtty.

— Munyń shaǵyn jáne orta bıznestiń qyzmetine ǵana emes, sondaı-aq baǵdarlamalyq-tsıfrlyq ónimderge de qatysy bar. Týrıstik lokatsııalarda sapaly uıaly baılanys pen ınternet bolýǵa tıis. Qonaq úıler men týrıster jıi baratyn basqa da oryndarda qyzmet kórsetý sapasy men qaýipsizdik deńgeıine, sondaı-aq baǵa saıasatynyń qolaıly bolýyna nazar aýdarý kerek. Týrıster úshin kelgen sátten bastap, búkil sapar marshrýty boıynsha jáne elden ketkenge deıin qolaıly jaǵdaılardy qamtamasyz etý qajet, — dep atap ótti Oljas Bektenov.

Atalǵan jumysty Týrızm, Іshki ister jáne Tótenshe jaǵdaılar mınıstrlikteri men ákimdikterge birlesip júrgizý tapsyryldy.

— Bul ásirese, qaýip deńgeıi joǵary aımaqtarǵa qatysty. Taýdaǵy demalysqa arnalǵan qural-jabdyqtar men kerek-jaraqtardy túgendep, týrısterdiń qaýipsizdik tehnıkasy týraly bilim deńgeıin arttyrýdy, sondaı-aq týrıster úshin yńǵaıly ári qaýipsiz ınfraqurylym qurýdy baqylaýǵa alý qajet, — dep atap ótti Oljas Bektenov.

Buǵan deıin habarlanǵandaı, týrısterge qolaıly bolý úshin Qazaqstannyń iri qalalarynda túnde ekspress-marshrýttar qatynaýy múmkin.