Bektenov tsıfrlandyrý týrasynda: birinshi basshylar túpkilikti nátıjelerge tikeleı jaýapty
ASTANA. KAZINFORM — Memlekettik organdardyń tsıfrlyq jáne jasandy ıntellekt jobalary shashyrańqy bolmaýy kerek. Bul týraly Úkimet otyrysynda Premer-mınıstr Oljas Bektenov málim etti.
- «Digital Qazaqstan» strategııasy memlekettik josparlaý júıesimen naqty baılanysty bolýǵa tıis. Jasandy ıntellekt mınıstrligi Strategııalyq josparlaý agenttigimen birlesip, osy jyldyń sońyna deıin strategııanyń nysanaly ındıkatorlaryn memlekettik organdardyń, óńirlerdiń jáne kvazımemlekettik sektor uıymdarynyń barlyq damý josparlaryna jiktep engizsin. Strategııany júzege asyrý iske qosylǵan jobalardyń sany boıynsha emes, belgilengen kórsetkishterdiń naqty oryndalýyna qaraı baǵalanýy qajet, - dedi O.Bektenov.
Sonymen qatar ol memlekettik organdardyń tsıfrlyq jáne jasandy ıntellekt jobalary shashyrańqy bolmaýy kerek ekenin atap ótti.
- Jasandy ıntellekt mınıstrligi eki aı ishinde iske asyrylyp jatqan jáne josparlanǵan tsıfrlyq jobalardy qaıta qarap, birin-biri qaıtalaıtyn sheshimderdi anyqtasyn jáne olardy biryńǵaı arhıtektýra men ortaq memlekettik platformalarǵa shoǵyrlandyrýdy qamtamasyz etsin. Bul resýrstardy shyn máninde mańyzdy jobalarǵa baǵyttaýǵa jáne birdeı fýnktsıonaldy birneshe ret qarjylandyrmaýǵa múmkindik beredi, - dedi Úkimet basshysy.
Onyń aıtýynsha, strategııany júzege asyrý úshin aıtarlyqtaı qarjylyq jáne tehnologııalyq resýrstar qajet. Bul rette olardyń kóptegen shashyrańqy bastamalarǵa tıimsiz bólinýine jol bermeý kerek.
- Jasandy ıntellekt mınıstrligi Qarjy mınıstrligimen birlesip, jyl sońyna deıin tsıfrlyq jobalarǵa basymdyq bersin. Strategııanyń kórsetkishterine qol jetkizýge tikeleı yqpal etetin sheshimderdi birinshi kezekte qarjylandyrý qajet. Tsıfrlandyrýǵa qatysty barlyq jańa bıýdjettik ótinimder Digital Qazaqstan arhıtektýrasy men basymdyqtaryna sáıkestigi, sondaı-aq kútiletin ekonomıkalyq áseri turǵysynan eskerile otyryp qaralýǵa tıis. Jalpy alǵanda, strategııanyń árbir baǵyty boıynsha naqty jobalar, kórsetkishter, merzimder jáne jaýapty oryndaýshylar bekitilgen. Birinshi basshylar túpkilikti nátıjelerge qol jetkizý úshin tikeleı jaýap beredi, - dedi Premer-mınıstr.
Aıta keteıik, Úkimet basshysy iri qalalardaǵy kólik keptelisi máselesin sheshýdi tapsyrdy.
