Bektenov tórtinshi munaı óńdeý zaýyty boıynsha sheshim qabyldaýdy tapsyrdy
ASTANA. KAZINFORM — Oljas Bektenov munaı óńdeý salasyn damytý máseleleri jóninde keńes ótkizdi.
Premer-mınıstr Oljas Bektenov Memleket basshysy Qasym-Jomart Toqaevtyń Úkimettiń keńeıtilgen otyrysynda qoldanystaǵy zaýyttardy jańǵyrtý jáne jańa tórtinshi munaı óńdeý zaýytyn salý jóninde bergen tapsyrmalarynyń oryndalý barysy qaralǵan keńes ótkizdi.
«QazMunaıGaz» UK» AQ basqarma tóraǵasy Ashat Hasenov jumys istep turǵan MÓZ-derdi keńeıtý jumystarynyń aǵymdaǵy jaı-kúıi men merzimderi týraly baıandady. 2030 jylǵa qaraı Shymkent munaı óńdeý zaýytynyń qýatyn jylyna 6 mln tonnadan 12 mln tonnaǵa deıin, al Pavlodar munaı-hımııa zaýytynyń qýatyn 2031 jylǵa qaraı 6 mln tonnadan 9 mln tonnaǵa deıin arttyrý josparlanyp otyr. Atyraý munaı óńdeý zaýytynda tıimdilikti arttyrý jobasy júzege asyrylýda; 2027 jyly aıaqtalýy josparlanǵan joba aıasynda zaýyttyń óndiristik qýaty 5,5 mln tonnadan 6,1 mln tonnaǵa deıin ulǵaıady.
Odan bólek, Shymkent munaı óńdeý zaýytyn jańǵyrtý aıasynda «Keńqııaq — Atyraý» jáne «Keńqııaq — Qumkól» magıstraldyq munaı qubyrlarynyń, «Tekesý» stansasynyń ótkizý qabiletin keńeıtý, sondaı-aq qýattylyǵy jylyna 3,5 mln tonnaǵa deıin jetetin «Shymkent — Almaty» munaı ónimderi jelisin salý qarastyrylǵan.
Jalpy, jumys istep turǵan úsh MÓZ-di keńeıtý jobalaryn júzege asyrý olardyń jıyntyq qýatyn jylyna 17,5 mln-nan 28,8 mln tonnaǵa deıin arttyrýǵa múmkindik beredi.
Energetıka vıtse-mınıstri Qaıyrhan Tutqyshbaev tórtinshi MÓZ salý máselesi pysyqtalyp jatqany týraly baıandady. Energetıka mınıstrliginiń málimetinshe, uzaq merzimdi perspektıvada eldiń munaı óńdeý qýattylyǵyna degen qajettilik jylyna 40 mln tonnaǵa jetýi múmkin.
Premer-mınıstr jyl sońyna deıin tórtinshi munaı óńdeý zaýytyn salý máselesi boıynsha keshendi baǵalaýdy aıaqtap, onyń ońtaıly qýatyn, konfıgýratsııasyn, shıkizat bazasyn, ornalasý ornyn jáne ekonomıkalyq modelin aıqyndaı otyryp, túpkilikti sheshimder qabyldaýdy tapsyrdy.
Keńeske qatysýshylarǵa orta jáne uzaqmerzimdi perspektıvada ishki naryqtyń qajettilikterin qamtamasyz etý maqsatynda salanyń óndiristik áleýetin arttyrý boıynsha birqatar tapsyrma berildi. Jaýapty memlekettik organdar men múddeli uıymdarǵa munaı óńdeý qýattaryn keńeıtý jobalaryn turaqty baqylaýda ustaý, merzimderdiń keshiktirilýine jol bermeý jáne nysandardyń ýaqtyly iske qosylýyn qamtamasyz etý tapsyryldy. Munaı ónimderine ishki suranystyń artýyn eskere otyryp, munaı óńdeýdi odan ári tereńdetýge erekshe nazar aýdaryldy.
— Munaı óńdeý qýatynyń artýy ishki naryqtaǵy JJM baǵasynyń tartymdylyǵymen tikeleı baılanysty. Qazirgi jaǵdaıda Qazaqstanda benzın men dızel otynynyń baǵasy kórshiles eldermen salystyrǵanda eki ese tómen bolǵandyqtan, munaı óńdeý salasyna ınvestıtsııa salý ekonomıkalyq turǵydan tıimsiz. Sondyqtan naryqty yryqtandyrýdy belsendi túrde jalǵastyrý qajet. Bul — ekonomıkalyq qaýipsizdik máselesi, — dep atap ótti Oljas Bektenov.
Aıta ketelik Qazaqstan 112 munaı-gaz ýchaskesin aýktsıonǵa shyǵaratyny týraly jazǵan edik.
