Bektenov tapsyrmasy: BI Group, BAZIS taǵy basqa kompanııalar 17 mlrd teńge salyq tóledi

ASTANA. KAZINFORM – Memlekettik kirister komıteti kásipkerlermen ózara esep aıyrysý arqyly salyq mindettemelerin ońtaılandyrý baǵytyndaǵy jumysty jalǵastyryp jatyr.

- Taldaý qorytyndysy boıynsha 633 salyq tóleýshige, onyń ishinde 172 qurylys salasynda (iri qurylys kompanııalaryn qosa alǵanda), 102 saýda jáne basqa da qyzmet túrlerimen aınalysatyn kompanııalarǵa salyq salynatyn kiristerin tómendetý belgileri boıynsha habarlamalar jiberildi. 12 naýryzdaǵy jaǵdaı boıynsha salyq tóleýshiler qosymsha eseptilik nysandaryn tapsyryp, salyqtaryn tolyqtyrýda. Qazir 17 mlrd teńge tólendi, onyń ishinde BI Group jáne BAZIS kompanııalary da óz tólemderin júzege asyrdy, - delingen Qarjy mınıstrligi taratqan aqparatta.

Sondaı-aq vedomstvo qazir derekterdi salystyrý jumysy jalǵasyp jatqanyn habarlady.

- Birqatar iri qurylys kompanııasy qarjy aǵynynyń ashyqtyǵy men qurylys salasyndaǵy kóleńkeli tustardy joıý úshin tsıfrlyq sheshimderdi ázirleýge jáne qarjylandyrýǵa bastamashylyq bildirip jatyr, - deıdi mınıstrlikten.

Osy oraıda Memlekettik kirister komıteti salyq tóleýshilerdi salyq zańnamasynyń talaptaryn qatań saqtaýǵa shaqyrady.

- Eger habarlama oryndalmaǵan jaǵdaıda salyq organdary keshendi salyqtyq tekserýler júrgizý týraly bastama kóteredi, - dep eskertedi.

Eske sala ketsek, aqpannyń sońynda Úkimet basshysy Oljas Bektenov kásipkerlerdi eki aptada salyq somasyn ádiletti túrde tóleýge shaqyrdy. Ol tizimde BI Group, BAZIS jáne basqa da kóptegen iri qurylys kompanııasy júr.

Artynsha Qarjy mınıstrligi BI Group, BAZIS-A kompanııalary kirisin tómendetip kórsetkenin habarlady. 

Sondaı-aq Premer-mınıstrdiń orynbasary – Ulttyq ekonomıka mınıstri Serik Jumanǵarın Úkimet basshysy Oljas Bektenovtiń salyq máselesine arnalǵan jıynda nege BI Group pen BAZIS-A kompanııalaryna shúılikkenin túsindirdi.