Bektenov sý tasqynynan keıin úılerdi qalpyna keltirý jaıynda: Jergilikti bılik jumysynda salǵyrttyq baıqalady

ASTANA. KAZINFORM – Búgin Úkimet otyrysynda Premer-Mınıstr Oljas Bektenov sý tasqynynan búlingen úılerdi belgilengen merzimde ári sapaly salýdy talap etti.

«Men ótken aptada Soltústik Qazaqstan oblysyna bardym. Jóndeý jáne qurylys jumystarynyń qarqyny jaqsy. Basqa óńirler áli qajetti qarqyndy ala almaı otyr. Taǵy da eske salamyn – jaz mezgili qysqa, bárin belgilengen merzimde, ári sapaly etip jasaýǵa biraz ýaqyt talap etiledi. Ókinishke oraı, jergilikti bılik organdarynyń jumysynda salǵyrttyq, sheshim qabyldaýda baıaýlyq, uıymdastyrý isinde álsizdik baıqalady. Ásirese Batys Qazaqstan jáne Atyraý oblystarynyń belsendiligin arttyrý qajet. Merzimderdi múldem buzýǵa bolmaıdy. Biraq tek merzim emes, sapa jaǵy da óte mańyzdy. Oǵan da jiti nazar aýdarý qajet», - dedi Úkimet basshysy.

Sondaı-aq, Oljas Bektenov kóptegen óńirde sý tasqynymen kúresý úshin qum men sazdan úıindiler jasalǵanyn, topyraq salynǵan qaptar paıdalanylǵanyn atap ótti.

«Endigi kezekte ákimdikter bárin órkenıetti túrge keltirý kerek. Ekologııaǵa zııan keltirmes úshin barlyq qapshyqtardy alyp tastap, kádege jaratý qajet», - dedi Premer-Mınıstr.