Bektenov: strategııalyq ınfraqurylymdyq jobalar qatań baqylaýda bolady
ASTANA. KAZINFORM — Premer-mınıstr Oljas Bektenov «Samuryq-Qazyna» AQ dırektorlar keńesiniń otyrysyn ótkizdi. Bul týraly Úkimettiń baspasóz qyzmeti habarlady.
Onda Qordyń 2025 jylǵy jumysynyń qorytyndylary jáne basym ınvestıtsııalyq jobalardy júzege asyrý máseleleri qaraldy.
Qordyń basqarma tóraǵasy Nurlan Jaqypov esepti kezeńdegi óndiristik jáne qarjylyq qyzmettiń nátıjelerin bıandady. Máselen, gazdy tasymaldaý bir jylda 9%-ǵa, júk aınalymy 5%-ǵa, munaı men gaz kondensatyn óndirý 3%-ǵa ósken. Qarjylyq turaqtylyq pen ınvestıtsııalyq dınamıkaǵa erekshe nazar aýdarylýda. 2025 jylǵy baǵalaý boıynsha Qordyń kirisi 19,1 trln teńgeni, EBITDA 5,4 trln teńgeni, taza paıda 2,1 trln teńge bolǵan. Basqarýdaǵy aktıvter $88 mlrd-qa deıin nemese 2024 jylmen salystyrǵanda 9%-ǵa óskeni atap ótildi. Ósim ınvestıtsııalyq jobalardy júzege asyrý jáne taza paıdany ulǵaıtý esebinen qamtamasyz etildi.
Dırektorlar keńesi sondaı-aq jalpy quny 52 trln teńge bolatyn, ekonomıkanyń basym salalaryn, sonyń ishinde energetıka, kólik, munaı-gaz sektory jáne basqa baǵyttardy qamtıtyn 120 jobadan turatyn toptyń ınvestıtsııalyq portfelin júzege asyrý barysy týraly aqparatyn tyńdady. Jobalardy júzege asyrý Memleket basshysynyń tapsyrmalary sheńberinde júrgiziledi. 2025 jyly Qor kompanııalary otandyq óndirýshilermen shamamen 2,2 trln teńgege (2024 jyly — 1,1 trln teńge) 9 myńǵa jýyq shart jasasyp, ósim 98%. Sondaı-aq 2025 jyly jalpy somasy shamamen 260 mlrd teńgege 363 ofteık-kelisimshart jasaldy, bul ótken jyldyń kórsetkishinen 30%-ǵa artyq.
2025 jyly «Samuryq-Qazyna» AQ jalpy quny 1,1 trln teńge bolatyn 10 jobany aıaqtady.
Olardyń qatarynda jylyna 750 myń tonnaǵa deıin ónim óndirý qýatymen CASPI BITUM óndirisin keńeıtý, táýligine 50 myń tekshe metr sý tuşytý qýaty bar Kendirlidegi tuşytý zaýyty, «Dostyq — Moıynty» temirjol jelisiniń ekinshi joldaryn salý, sondaı-aq konteınerlik ınfraqurylymdy damytý jáne ónerkásiptik óndiristi lokalızatsııalaý jobalary bar.
2026 jyly energetıkalyq, kólik, tsıfrlyq jáne ónerkásiptik ınfraqurylymdy damytýǵa, tranzıttik áleýetti nyǵaıtýǵa ári Qazaqstan Respýblıkasynyń turaqty ekonomıkalyq ósimin qamtamasyz etýge baǵyttalǵan birqatar strategııalyq mańyzdy jobany aıaqtaý josparlanyp otyr.
Nurlan Jaqypov Keńes múshelerine 2026 jyly elimizdiń JІÓ-niń ósimine oń áser etetin josparlanǵan ınvestıtsııalyq shyǵyndar 5,3 trln teńge (2025 jyly — 2,7 trln teńge, 2024 jyly — 2 trln teńge) bolatynyn habarlady. Bul qarajatqa jańa qýattardy iske qosýǵa kózdelgen, olardyń ishinde Almaty qalasynda JEO-2 jáne JEO-3, Túrkistan BGQ, Kaspıı teńiziniń túbindegi Transkaspıı talshyqty-optıkalyq jelisi jáne taǵy basqalar bar.
Premer-mınıstr qor basshylyǵyna iri jobalardyń júzege asyrylýyn kúndelikti tikeleı baqylaýda ustaýdy tapsyrdy.
— Bazalyq ınfraqurylymdy: energetıkalyq, kóliktik, tsıfrlyq ınfraqurylymdy salý jónindegi jobalar erekshe baqylaýdy talap etedi. Barlyq nysan belgilengen merzimde tapsyrylýy tıis, — dep atap ótti Oljas Bektenov.
Aıta ketelik Premer-mınıstr ınvestıtsııalyq saıasattyń jańa kezeńin jarııalaǵan edi.