Bektenov SQO-nyń kommýnaldyq-energetıkalyq sektoryn jańǵyrtý qarqynymen tanysty
ASTANA. KAZINFORM — Premer-mınıstr Oljas Bektenov Soltústik Qazaqstan oblysyna jumys sapary aıasynda óńirdiń kommýnaldyq-energetıkalyq ınfraqurylymyn jańǵyrtý jumystarynyń barysymen jáne jylýmen úzdiksiz qamtamasyz etý boıynsha qabyldanyp jatqan sharalarmen tanysty.
Jabdyqtardy jóndeý jáne qalpyna keltirý boıynsha aıtarlyqtaı jumystar júrgizilgen Petropavl 2-JEO-ǵa erekshe nazar aýdaryldy. «SevKazEnergo» AQ bas dırektory qazandyq agregattary men týrbogeneratorlar sııaqty negizgi tehnıkalyq quraldardyń tozý deńgeıi 57,3%-dy quraıtynyn habarlady. 2024 jyly 2-JEO-da №1, 9 qazandyqtary men №3, 6 týrbınalaryna kúrdeli jóndeý júrgizilip, sondaı-aq tórt týrbınany jóndeý jumystary aıaqtalǵan.
Sonymen qatar bıiktigi 180 metr №1 tútin murjasynyń qurylysy aıaqtaldy, ony paıdalanýǵa berý jyl sońyna josparlanǵan. Sondaı-aq №3, 6, 11 úsh qazandyqta jáne №7 bir týrbınada qalpyna keltirý jumystary jalǵasýda.
Kásiporyn basshylyǵynyń aqparatyna sáıkes, 2-JEO kómir jáne mazýtpen tolyq qamtamasyz etilgen. Qazirgi ýaqytta qorda 183 myń tonna kómir, 1833 tonna mazýt bar. Otyn jetkizý kestege sáıkes júzege asyrylýda.
Jylý elektr ortalyqtarynda ýaqtyly júrgizilgen daıyndyq pen qalpyna keltirý jumystary qalanyń jylýmen qamtý jabdyqtary men júıeleriniń turaqty jumysyn qamtamasyz etýge múmkindik berdi. Aǵymdaǵy jylytý maýsymy shtattyq rejımde ótýde. QR Energetıka mınıstrligi bıyl nysandy qaýiptiń «qyzyl» aımaǵynan «sary» aımaqqa shyǵarýdy josparlap otyr.
Kásiporynda Premer-mınıstrge «Energetıkalyq jáne kommýnaldyq sektorlardy jańǵyrtý» ulttyq jobasynyń iske asyrylý barysy týraly baıandaldy. Búginde Soltústik Qazaqstan oblysynda 363 medıtsınalyq mekemeni, 585 oqý ornyn, 156 mádenıet jáne sport nysanyn, sondaı-aq 1435 kóppáterli turǵyn úıdi jylýmen qamtamasyz etetin 490 qazandyq jumys isteıdi.
- Jylýmen úzdiksiz qamtamasyz etý Memleket basshysynyń erekshe baqylaýynda. Sońǵy bir jylda elimizdegi 55 jylý kózi jańǵyrtyldy. Úkimet osy baǵytta energetıkalyq jáne kommýnaldyq sektorlardy jańǵyrtý jónindegi ulttyq jobany iske asyrýda. Júrgizilgen jumystardyń nátıjesi boıynsha ınjenerlik jelilerdiń tozý deńgeıi 40%-ǵa deıin tómendep, elektr energııasyn óndirý qýaty 7,3 GVt-qa artady dep boljanýda. Sonymen qatar jobalar 3,5 myń jumys ornyn ashýdy kózdeıdi,— dep atap ótti Premer-mınıstr.
Oljas Bektenov SQO kásipkerlerimen salyq reformasyn talqylap, ózekti suraqtarǵa jaýap bergen edi.