Bektenov senatorlardyń buzaqylyqtyń aldyn alý josparyn ázirleý usynysyna jaýap berdi

ASTANA. KAZINFORM — Premer-mınıstr Oljas Bektenov Senat depýtattarynyń buzaqylyq pen usaq buzaqylyqtyń aldyn alý jónindegi ulttyq keshendi jospar ázirleý usynysyna jaýap berdi.

— Quqyq buzýshylyqtardyń aldyn alý aıasynda qoǵamdyq tártipti buzatyn jáne qoǵamnyń adamgershilik negizderine qol suǵatyn faktilerdi (usaq buzaqylyq, alkogoldik ishimdikter ishý, tynyshtyqty buzý jáne t. b.) anyqtaý, keıinnen qoldanystaǵy zańnamaǵa sáıkes den qoıý sharalaryn qabyldaý basym baǵyt sanalady. Qabyldanǵan sharalar 16,7 paıyzdan astam (5,5 mln-nan 6,6 mln-ǵa deıin) ákimshilik quqyq buzýshylyqtyń, onyń ishinde 337,3 myńy qoǵamdyq tártipti buzýdyń (2024 jyly — 323 myń) jolyn kesti, — dedi premer-mınıstr.

Úkimet basshysynyń dereginshe, osy jyldyń basynan qylmystyq quqyq buzýshylyqtardyń jalpy sanynyń 5,9 paıyzǵa (52 774-ten 49 667-ge deıin), urlyqtyń 24 paıyzǵa (13 190-nan 9 578-ge deıin), buzaqylyqtyń 26 paıyzǵa (709-dan 526-ǵa deıin), qoǵamdyq oryndardaǵy qylmystardyń 7 paıyzǵa (14 506-dan 13 516-ǵa deıin), onyń ishinde kóshelerde 5 paıyzǵa (6 388-den 6 076-ǵa deıin) tómendeýine qol jetkizildi.

— Qoǵamdyq tártipti buzýdyń aldyn alý boıynsha jumys erekshe baqylaýda. Osyǵan baılanysty Іshki ister mınıstrligi buzaqylyq pen usaq buzaqylyqtyń aldyn alý jónindegi ulttyq keshendi jospar ázirleý jáne qabyldaý máselesin qarastyrýdy joǵaryda kórsetilgen sharalardy iske asyrýdyń nátıjesi tıimsiz bolǵan jaǵdaıda oryndy dep sanaıdy, — dedi Oljas Bektenov.

Esterińizge sala ketsek, senator Gennadıı Shıpovskıh buzaqylyq pen usaq buzaqylyqtyń aldyn alý jónindegi keshendi ulttyq jospar qabyldaý kerektigin aıtyp, Úkimet basshysynyń atyna depýtattyq saýal joldaǵan edi.