Bektenov «Samuryq-Energo» basshysyna: Ekibastuz GRES-teri jumysynda eshqandaı olqylyq bolmasyn
ASTANA. KAZINFORM – Premer-mınıstr Oljas Bektenov «Samuryq-Energo» AQ basqarma tóraǵasy Qaırat Maqsutovqa Ekibastuz GRES-teriniń jumysynda eshqandaı olqylyq boldyrmaýdy tapsyrdy.
- Ótken jylytý maýsymynda Ekibastuzdaǵy birinshi jáne ekinshi GRES-te jospardan tys jaǵdaılar men jóndeý jumystarynyń artqany baıqaldy. Ol generatsııa kózderi boıynsha qandaı jumystar atqaryp jatyrsyzdar?, - dep surady Premer-mınıstr kompanııa basshysynan.
Saýalǵa jaýap bergen Qaırat Maqsutovtyń aıtýynsha, «Samuryq-Energo» stansalary osydan 30-40 jyl buryn iske qosylǵan.
- Sondyqtan negizgi jabdyqtary uzaq merzimnen beri paıdalanylyp keledi. Onyń ishinde tozý máselesi bar. Biraq, soǵan qaramastan jóndeý jumystaryn tolyq qarjylandyrý máselesin sheship jatyrmyz. Jóndeý jumystarynyń kólemin jyldan-jylǵa arttyryp otyrmyz. Ásirese, jóndeý jumystarynyń sapaly bolýyna basa nazar aýdarýdamyz. Atqarylyp jatqan jumystar nátıjesin berýi kerek. Jospardan tys toqtaýdy azaıtamyz, - dedi ol.
Osy oraıda Úkimet basshysy Ekibastuzdaǵy birinshi jáne ekinshi GRES eń mańyzdy generatsııa kózderi ekendigin basa aıtty.
- Sondyqtan eshqandaı olqylyqtar, kemshilikter bolmasyn. Baqylaýda ustańyz, - dep eskertti Oljas Bektenov.
Sonymen qatar Oljas Bektenov oǵan Almatydaǵy JEO-3 qurylysyn ýaqytyly aıaqtaýdy tapsyrdy.
