Bektenov: Salyq organdarynyń mindeti – qatelikter úshin jazalaý emes, qatelespeýge kómektesý
ASTANA. KAZINFORM — Ákimder árbir kásipkerdiń tabysqa jetýine múddeli bolady. Bul týraly búgin Úkimet otyrysynda Premer-mınıstr Oljas Bektenov aıtty.
— Halyqtyń tabysynyń mańyzdy kózi sanalatyn kásipkerlikti damytý — Memleket basshysynyń árdaıym erekshe nazarynda. Búginde elimizde 2,2 mıllıonnan astam shaǵyn bıznes sýbektisi jumys isteıdi.Onda shamamen mıllıon adam jumyspen qamtylǵan. Kásipkerlikti odan ári damytý úshin bıznes júrgizý qaǵıdalaryn jetildirip, ony neǵurlym túsinikti ári ashyq bolýyn qamtamasyz etý mańyzdy. Úkimet bıznes-qaýymdastyqpen ózara tyǵyz is-qımyl jasaı otyryp, jańa salyq saıasatyn qalyptastyrýda, — dedi Úkimet basshysy.
Premer-mınıstr negizgi mańyzdy ózgeris retinde servıstik modelge kóshýdi atady.
— Kásipkerdi tirkelgen sátinen bastap, qyzmetiniń barlyq kezeńinde fıskaldyq qoldaý júıesi engizilýde. Salyq organdarynyń aldynda turǵan mindet — qatelikter úshin jazalaý emes, kerisinshe qatelespeýge kómektesý. Ekinshiden — eseptilik pen bıýrokratııanyń azaıýy. Salyqtyq eseptilik 30, al salyqtar men alymdardyń sany 20 paıyzǵa qysqarady. Bul kásipkerdiń esep berýge jumsalatyn ýaqytyn azaıtyp, óz bıznesin damytýǵa kóbirek kóńil bólýine yqpal etedi, — dedi ol.
Úkimet basshysy úshinshiden tekserýler tek táýekelder boıynsha ǵana júrgiziletin aıtty.
— Biz josparly salyq tekserýlerinen tolyq bas tarttyq. Mıkro jáne shaǵyn bıznes úshin mańyzdy másele — 2026 jylǵa deıingi kezeńder boıynsha salyq tekserýleri men kameraldyq baqylaý alynyp tastalady. Adal bıznes salyq organdarynyń kelýin kútpeı, alańsyz jumys isteýge múmkindik alady, — dedi Oljas Bektenov.
Ol tórtinshiden aıyppul salýǵa emes, aldyn alýǵa basa nazar aýdarylatynyn atap ótti.
— Yqtımal zań buzýshylyqtar oryn alǵan kezde aldyn ala habardar etý tetigi engiziledi. Bul bızneske is-áreketin qarjylyq shyǵyndarsyz kúni buryn túzetýine múmkindik beredi. Besinshiden, jańa Bıýdjet kodeksi shaǵyn bıznesten túsetin barlyq salyq túsimderin ákimdikterdiń ıeliginde qaldyrýdy kózdeıdi. Endi ákimder árbir kásipkerdiń tabysqa jetýine múddeli bolady. Óıtkeni ol jergilikti bıýdjet kiristeriniń ósýine tikeleı yqpal etedi. Salyq tóleýshi «Tsıfrlyq bıýdjet» arqyly aýdarym qarajatynyń ózi turatyn aımaqty kórkeıtýge qalaı áser etip jatqanyn kóre alady, — dedi Premer-mınıstr.
Aıta keteıik, búgin Úkimet otyrysynda «Іsker aımaq» shaǵyn bıznesti qoldaýdyń biryńǵaı baǵdarlamasy tanystyryldy.