Bektenov otandyq ónimdi shetel naryǵyna shyǵarýdaǵy kedergilerdi azaıtýdy tapsyrdy
ASTANA. KAZINFORM — Otandyq ónimdi syrtqy naryqtarǵa jetkizý barysyndaǵy kedergilerdi azaıtý kerek. Bul týraly búgin Úkimet otyrysynda Premer-mınıstr Oljas Bektenov aıtty.
— Naqty sektordy odan ári damytý úshin óńdeý ónerkásibindegi óndiris kólemin tómendetip almaý mańyzdy. Metallýrgııa ekonomıkadaǵy kóptegen salalardyń negizgi tiregi. Sondyqtan onyń ornyqty damýyn qamtamasyz etip, qolda bar áleýetti iske asyrý baǵytynda tıisti sharalardy qabyldaý kerek. Metallýrgııalyq kásiporyndardy shıkizatpen tolyq qamtamasyz etý úshin sheteldik seriktestermen barlyq kelissózderdi aıaqtap, naqty qadamdarǵa kirisý qajet. Onyń ishinde, ónimdi jetkizý geografııasyn keńeıtýge de basa nazar aýdarǵan jón, — dedi ol.
Osy rette Úkimet basshysy «Samuryq-Qazyna» qory men Ónerkásip mınıstrligine otandyq metallýrgııa kásiporyndaryn shıkizatpen uzaqmerzimdi qamtamasyz etý tetikterin pysyqtaýdy tapsyrdy.
— Saýda mınıstrligi otandyq ónimdi syrtqy naryqtarǵa jetkizý barysynda kedergilerdi azaıtý úshin qosymsha sharalar qabyldasyn. Sonymen qatar Qarjy mınıstrligi «kóleńkeli» aınalymdaǵy ónimderdiń ákelinýine qarsy baqylaýdy kúsheıtýi kerek, — dedi Oljas Bektenov.
Buǵan deıin Premer-mınıstr Úkimettiń basty mindeti– ınflıatsııany 10%-dan tómen deńgeıde ustap turý ekenin aıtqan bolatyn.
