Bektenov Ónerkásip jáne qurylys mınıstrligi ujymyna jańa mınıstrdi tanystyrdy

ASTANA. KAZINFORM – Premer-mınıstri Oljas Bektenov Ónerkásip jáne qurylys mınıstrliginiń jańa basshysyn tanystyrdy.

Oljas Bektenov Qanat Sharlapaevqa salalardy, ásirese, óńdeý ónerkásibin damytýǵa qosqan úlesi úshin alǵysyn bildirdi.

Otandyq óndirýshilerdi qoldaý sharalaryn keńeıtý, zańnamany jetildirý boıynsha aýqymdy jumystar júrgizildi. Ótken jyly óńdeý ónerkásibiniń kólemi sońǵy 10 jyldaǵy eń serpindi ósimge qol jetkizip, 5,9%-ǵa ósti. 

Jańa mınıstr – Ersaıyn Naǵaspaevty tanystyrý barysynda Premer-mınıstr qol jetkizilgen nátıjelerdi bekitý jáne óńdeý ónerkásibiniń odan ári ósýin qamtamasyz etý boıynsha Memleket basshysy alǵa qoıǵan mindetterdi atap ótti.

Importty almastyrýdy qamtamasyz etý jáne eksportty keńeıtý úshin qosylǵan quny joǵary ónim shyǵarýdy jandandyrý jóninde birqatar tapsyrma berildi. Investorlarmen jáne bıznes ókilderimen tyǵyz qarym-qatynasqa basa nazar aýdarylady. ÓQM ujymyna Prezıdenttiń qurylys salasyn damytý jáne turǵyn úı-kommýnaldyq ınfraqurylymdy jańǵyrtý jónindegi tapsyrmalaryn oryndaý boıynsha mindetter belgilendi.

Aıta ketelik Ersaıyn Naǵaspaev Ónerkásip jáne qurylys mınıstri bolyp taǵaıyndalǵan edi.