Bektenov: Medıtsınalyq kómek kórsetý standarttary men erejelerin qaıta qaraý kerek
ASTANA. KAZINFORM — Tegin dári-dármekpen qamtamasyz etý máselesine qatysty alańdaýshylyq bildirgen azamattarǵa qulaq asý qajet. Bul týraly Úkimet otyrysynda Premer-mınıstr Oljas Bektenov aıtty.
— Densaýlyq saqtaý mınıstrligi Eńbek mınıstrligimen jáne óńir ákimdikterimen birge medıtsınalyq saqtandyrýdyń jańa tetigin engizý boıynsha úılesimdi jumys júrgizýge tıis. Medıtsınalyq kómektiń qoljetimdiligi men sapasyna, tegin dári-dármekpen qamtamasyz etý máselesine qatysty alańdaýshylyq bildirgen azamattarǵa da qulaq asý qajet. Keıbir jańa erejelerdi túsiný qıyn. Sondyqtan árbir adam medıtsınalyq kómek alý tetikteri men ony jetildirý jumystarynan habardar bolýy kerek. Balalarǵa, zeınetkerlerge, múgedekter men azamattardyń basqa da jeńildikti sanattaryna medıtsınalyq kómek kórsetý tártibi men kólemi ózgerissiz qalýǵa tıis, — dedi Premer-mınıstr.
Onyń atap ótýinshe, jańa medıtsınalyq nysandardyń ashylýymen halyqtyń, ásirese aýyl turǵyndarynyń medıtsınalyq kómekke qoljetimdiligi edáýir keńeıip jatyr. Bıyl 655 densaýlyq saqtaý nysanynyń qurylysy aıaqtalyp, 1 mıllıon aýyl turǵyny alǵashqy medıtsınalyq-sanıtarııalyq kómekpen qamtylatyn bolady.
— Jalpy, bıyl medıtsınalyq kómek kórsetýge memlekettik bıýdjetten 3 trıllıon teńge bólindi. Bul — qomaqty qarajat. Sondyqtan Densaýlyq saqtaý mınıstrligi qarjynyń tıimdi jumsalýyn jáne medıtsınalyq qyzmetterdiń sapasyn, onyń ishinde tsıfrlyq quraldar men jasandy ıntellekt elementterin engizý arqyly qatań baqylaýǵa alsyn. Sonymen qatar mınıstrlik medıtsınalyq kómek kórsetý standarttary men erejelerin qaıta qaraýy kerek. Emdelýshiler úshin bárin ońtaılandyryp, barynsha jeńildetý kerek, — dedi Oljas Bektenov.
Aıta keteıik, 2026 jyly elektrondy densaýlyq pasporttary azamattarǵa tolyqqandy qoljetimdi bolady.