Bektenov Kaspıı jaǵasynda salynatyn keme jasaý zaýytynyń jobasyn qarady

Atap aıtqanda, Premer-mınıstri Transkaspıı halyqaralyq kólik baǵytyn (THKB) damytý jáne otandyq óndiristik qýattardy keńeıtý baǵytyndaǵy jobalarmen tanysty.

Úkimettiń baspasóz qyzmetiniń habarlaýynsha, Aqtaý halyqaralyq áýejaıynda Premer-mınıstrge Kaspıı teńizine shyǵý múmkindigi men zamanaýı port ınfraqurylymynyń arqasynda THKB-ny damytýda mańyzdy ról atqaratyn Mańǵystaý oblysynyń kólik-logıstıkalyq áleýeti týraly baıandaldy. Keıingi úsh jylda Qazaqstan porttary arqyly konteınerlik tranzıt kólemi 3,8 ese artyp, 42 myń JFE-ge deıin jetti. Bul rette porttardyń jıyntyq ótkizý qabileti jylyna shamamen 200 myń JFE-ge deıin jetkizildi.

Oljas Bektenov sondaı-aq Kaspıı teńiziniń jaǵalaýynda zamanaýı keme qurastyrý verfin salý jobasymen tanysty. Jobanyń ınvestıtsııa kólemi keminde 125 mlrd teńge bolady.

YDA Group dırektorlar keńesiniń tóraǵasy Hýseın Arslan kásiporynda azamattyq jáne arnaıy kemelerdi jobalaý men jasaýdan bastap, olarǵa tehnıkalyq qyzmet kórsetý jáne kúrdeli jóndeýge deıingi óndiristiń tolyq tsıkli jolǵa qoıylatynyn aıtty. Sonymen qatar ekıpajsyz sýústi apparattaryn shyǵarý kózdelgen. Óndiristik qýaty jylyna 8 jańa keme jasaýǵa jáne 24 kemege jóndeý jumystaryn júrgizýge múmkindik beredi. Nysan paıdalanýǵa berilgennen keıin 1,5 myń turaqty jumys orny ashylady. Joba aıasynda tehnologııalar transferi, halyqaralyq standarttar engizý jáne qazaqstandyq mamandar daıarlaýǵa arnalǵan oqý ortalyǵy ashylatyny atap ótildi. Óndiristik kooperatsııaǵa otandyq shaǵyn jáne orta bıznes kásiporyndaryn tartý josparlanyp otyr.

Sonymen qatar Aqtaý áýejaıy bazasynda mýltımodaldy logıstıkalyq jáne avıatsııalyq hab qurý jobasy qaraldy. Keshende áýe kemelerine tehnıkalyq qyzmet kórsetý men jóndeý, áýe júkterin tasymaldaý, mamandar daıarlaý jáne logıstıka áýe, teńiz, temirjol jáne avtomobıl kóligi ıntegratsııasymen biriktiriledi.

Jyl saıyn keshende 200-den astam áýe kemesine tehnıkalyq qyzmet kórsetý jáne 60-qa deıin boıaý jumystary júrgiziledi dep josparlanǵan. Joba aıasynda 3,5 myń turaqty jumys orny ashylady.

Premer-mınıstrge Quryq portynda kópfýnktsıonaldy termınaldyń birinshi kezeńin salý jospary týraly baıandaldy. Joba Memleket basshysy Qasym-Jomart Toqaevtyń bıyl shildede QHR-ǵa jumys sapary barysynda qol jetkizilgen ýaǵdalastyqtar sheńberinde júzege asyrylyp jatyr.

Guoyou Materials Group dırektorlar keńesiniń tóraǵasy ıÝı Boıan kompanııanyń jobaǵa 470 mlrd teńge ınvestıtsııa salatynyn habarlady. Joba aıasynda avtomattandyrylǵan konteınerlik termınal qurý, ulttyq jelige qosylǵan temirjol jelisin salý, konteınerlik kemeler men paromdardy jetkizý kózdelgen.

Jobanyń birinshi kezeńiniń ótkizý qabileti jylyna 15 mln tonnaǵa deıingi júk bolady. Qurylys jumystaryn 2026–2028 jyldar aralyǵynda júrgizý josparlanǵan. Ekinshi kezeń 2029-2031 jyldary júzege asyrylady, al nysandy paıdalanýǵa berý 2032 jyly kózdelip otyr. Barlyq keshen aıaqtalǵannan keıin onyń qýattylyǵy odan ári keńeıtý múmkindigimen jylyna shamamen 25 mln tonnaǵa jetedi. Joba sheńberinde 800-ge deıin jumys ornyn ashý, qazaqstandyq tehnıkalyq kadrlardy daıarlaý jáne operatsııalyq qyzmetti kezeń-kezeńimen lokalızatsııalaý kózdelip otyr.

Oljas Bektenov ortalyq memlekettik organdar men Mańǵystaý oblysynyń ákimdigine qaralǵan jobalardyń sapaly ári ýaqtyly júzege asyrylýyn qamtamasyz etýdi tapsyrdy. Qurylys merzimderin saqtaýǵa, ınvestıtsııalar tartýǵa, turaqty jumys oryndaryn ashýǵa, óndiristi lokalızatsııalaýǵa jáne óńir halqy men ekonomıkasy úshin naqty nátıjege qol jetkizýge erekshe nazar aýdarý qajet.

— Memleket basshysy Qazaqstandy Eýrazııanyń negizgi kólik torabyna aınaldyrý mindetin qoıdy. Mańǵystaý oblysy Qazaqstan damýynyń jańa kezeńiniń negizgi óńirleriniń biri bolýy tıis. Memleket basshysy júzege asyryp jatqan aýqymdy reformalar ekonomıka men ınfraqurylymdy túbegeıli jańǵyrtýdy kózdeıdi. Búgin qaralǵan jobalar jańa ónerkásiptik óndirister men tıimdi kólik-logıstıkalyq júıeni qalyptastyrýdyń berik negizin qalaıdy. Úkimet qajetti qoldaýdy qamtamasyz etedi. Árbir joba sapaly, merzimderdi saqtaı otyryp jáne halyq úshin naqty nátıjemen júzege asyrylýǵa tıis, — dep atap ótti Premer-mınıstr.

Guoyou Materials Group dırektorlar keńesiniń tóraǵasy ıÝı Boıan Quryq portynyń bazasynda Eýrazııalyq logıstıkalyq hab qurý jónindegi ýaǵdalastyqtar týraly aıtty.

— Prezıdent Qasym-Jomart Toqaev Qytaıǵa sapary barysynda bizben jeke kezdesý ótkizdi. Eýrazııalyq baılanystyrýshy habqa aınalatyn Qazaqstandaǵy Kaspııde jańa port salý jobasy Prezıdent tarapynan maquldanyp, joǵary baǵaǵa ıe boldy. Qazirgi ýaqytta biz bul úderisti belsendi túrde ilgeriletip jatyrmyz. Prezıdenttiń qatysýymen taraptar resmı qujattarǵa qol qoıdy. Osy portqa salynǵan ınvestıtsııalardyń jalpy kólemi $1 mlrd-qa baǵalanady. Birinshi kezeńde onyń jyldyq ótkizý qabileti 15 mln tonna bolady, al ekinshi kezeńde ol 25 mln tonnaǵa jetedi dep josparlanyp otyr. Joba Qazaqstanda 800 jumys ornyn ashýǵa múmkindik beredi, — dep atap ótti ıÝı Boıan.

Eske salaıyq, buǵan deıin Oljas Bektenov avtobólshek óndirisiniń josparyn bir aıda ázirleýdi tapsyrǵan edi.