Elimizdiń eń iri astyqty óńiri bıyl 5,1 mln gektar alqaptan ónim alady
ASTANA. KAZINFORM – Onyń ishinde dándi jáne burshaqty daqyldar 4,2 mln gektarǵa egiledi dep josparlanyp otyr, dep habarlaıdy Úkimettiń baspasóz qyzmeti.
Qostanaı oblysyna jumys sapary aıasynda Premer-mınıstr Oljas Bektenov kóktemgi dala jumystarynyń barysyn tekserip, óńirdiń aýyl sharýashylyǵy qurylymdary ókilderimen agroónerkásip keshenin damytýdyń ózekti máselelerin talqylady.
Premer-mınıstrge «Selo Vostochnoe» JShS jumysyn kórsetý arqyly salany memlekettik qoldaý sharalarynyń tıimdiligi týraly baıandady. Aǵymdaǵy egis naýqanynda fermerler tuqymdarmen, dızel otyny jáne mıneraldy tyńaıtqyshtarmen tolyq qamtamasyz etilgen. «Selo Vostochnoe» JShS dırektory Ivan Popovıch bıyl jalpy jazdyq egis 54 myń gektardy quraıtynyn habarlady. Onyń ishinde bıdaı 47 myń gektar alqapqa, arpa 5,3 myń gektarǵa egildi. Sharýashylyq ósirilgen astyqty ishki naryqtyń qajettilikterin jabý úshin ótkizedi.
Óz kezeginde Qostanaı oblysy ákiminiń orynbasary Arman Ábenov óńirdegi kóktemgi egis jumystarynyń qarqyny týraly baıandady. Elimizdiń eń iri astyqty óńir bıyl 5,1 mln gektar alqaptan ónim alady, onyń ishinde dándi jáne burshaqty daqyldar 4,2 mln gektarǵa egiledi dep josparlanýda. Ártaraptandyrý sheńberinde maıly daqyldardyń, áleýmettik mańyzy bar jáne jemshóp daqyldarynyń úlesi artyp keledi. Bıyl fermerler mıneraldy tyńaıtqyshtardy engizýdiń kólemin 1,3 esege — 337,6 myń tonnaǵa deıin ulǵaıtýdy josparlap otyr. Qarjy ınstıtýttary arqyly jeńildetilgen nesıeleý baǵdarlamalary boıynsha aýyl sharýashylyǵy qurylymdaryna 91,5 mlrd teńge bólindi, bul ótken jyldyń deńgeıinen 1,2 ese kóp.
Sondaı-aq 2025 jyly óńirde AÓK salasynda quny 52,5 mlrd teńgeni quraıtyn 36 ınvestıtsııalyq jobany paıdalanýǵa berý josparlanýda, bul 600-den astam jańa jumys ornyn ashýǵa múmkindik beredi. Bul rette 2027 jylǵa deıin 93 joba men 4,4 myń jumys ornyn ashý kózdelgen.
Egis alqabynda Premer-mınıstr Qostanaı oblysynyń iri aýyl sharýashylyǵy taýaryn óndirýshilerimen kezdesti. Aýyl sharýashylyǵyn damytýdyń ózekti máseleleri, onyń ishinde IV Ulttyq quryltaıda Prezıdenttiń jalpy ónim shyǵarý men eńbek ónimdiligin arttyrý jáne astyqty tereń óńdeý kólemin ulǵaıtý jónindegi mindetterin eskere otyryp talqylandy. Ósimdik sharýashylyǵyn ǵana emes, aýylda jyl boıy jumyspen qamtýdy qamtamasyz etetin sala retinde mal sharýashylyǵyn da damytýǵa nazar aýdarylýda. Kezdesý barysynda «Altynsarıno» JShS basshysy Borıs Knıazev, «AB agro» JShS basshysy Nurqanat Tájnııaz, «Syma-K» JShS basshysy Manat Karbozov jáne basqalary sóz sóıledi. Aınalym qarajatyn tolyqtyrý úshin sharýalardy sýbsıdııalaý, mal sharýashylyǵy salasyndaǵy ınvestıtsııalyq jobalardy jeńildikpen qarjylandyrý, sala úshin bilikti mamandar daıarlaý, sondaı-aq aýyldyq eldi mekenderdi damytýǵa bıznestiń belsendi qatysýy máseleleri kóterildi.
«Altynsarıno» JShS dırektory Borıs Knıazev jyl saıyn kóptegen kásiporyndar paıdalanatyn jeńildetilgen nesıeleý baǵdarlamasynyń mańyzdylyǵyn atap ótti. Máselen, sharýashylyq tehnıkasynyń negizgi bóligi — 326 traktor, 56 tuqym sebý kesheni jáne 87 ónimdiligi joǵary kombaındar memlekettik qoldaý baǵdarlamalary arqyly satyp alyndy.
— Biz aýyl sharýashylyǵyn qoldaýǵa 700 mlrd teńge bólip, bul kórsetkishti 1 trln teńgege jetkizgimiz keledi degen sheshimdi qýana qabyldadyq. Bul óte jaqsy. Biz ártúrli salalarda — qurylys, JJM, salyqtar boıynsha qoldaýǵa ıe bolyp otyrmyz. Memlekettiń qamqorlyǵyna ónim óndirisin ulǵaıtý arqyly jaýap berý qajet ekenin túsinemiz. Sondaı-aq adamdarǵa, áleýmettik mádenı ómirge qamqorlyq jasaý kerek, buǵan da nazar aýdaramyz. Mysaly, bizdiń sharýashylyq 10 abattandyrylǵan úı salyp jatyr. Ótken jyly gazdandyrýǵa, asfalt tóseýge, úı salýǵa jáne abattandyrýǵa shamamen 1 mlrd teńge jumsaldy. Memleket kómektesip, siz de ózińiz ınvestıtsııa salsańyz, jaqsy nátıje alasyz. Birge bolǵanda kez kelgen júkti kóterý árqashan ońaı, — dep atap ótti «Altynsarıno» JShS dırektory Borıs Knıazev.
«AB agro» JShS dırektory Nurqanat Tájnııaz 12 myń basqa arnalǵan qoı fermasyn qurý josparymen bólisti. Óńirde júzege asyrylyp jatqan AÓK ınvestıtsııalyq jobalaryn qarjylandyrý boıynsha Soltústik Qazaqstan oblysynyń tájirıbesin keńeıtý baǵdarlamasyna qatysý máselesi kóterildi.
«Syma-K» JShS dırektory Manat Karbozov óz kezeginde memlekettik qoldaý sharalary aıasynda sharýashylyq úsh jyl ishinde mal basyn eki esege — 1,5 myń basqa deıin arttyrǵanyn jetkizdi.
Sharýalarmen kezdesý barysynda Oljas Bektenov Úkimet agroónerkásip keshenin qoldaý boıynsha júıeli jumys júrgizip jatqanyn aıtty.
— Sizder bilesizder, sońǵy jyldary Prezıdenttiń tapsyrmasyna sáıkes biz aýyl sharýashylyǵy salasyna kóp kóńil bólýdemiz. Byltyrdan beri qomaqty qarjy quıyldy. Salystyratyn bolsaq, 2022 jylǵa deıin qarjylandyrý 70 mlrd teńgeden aspaǵan. Bıyl 700 mlrd teńge ınvestıtsııa salyp jatyrmyz. Memlekettik qoldaý 10 ese ósti. Kórsetkishterge qarasaq ta, aýyl sharýashylyǵynyń jalpy ishki ónimi shamamen 4%-dy quraıdy. Kóp emes, biraq bul ulttyq qaýipsizdik máselesi. Biz ózimizdi negizgi azyq-túlik túrlerimen qamtamasyz etýimiz kerek. Kelesi jyly qoldaý kólemin arttyramyz, — dep atap ótti Oljas Bektenov.
Sonymen qatar aýyldyq aýmaqtardy damytýdyń jáne bıznestiń áleýmettik jaýapkershiliginiń mańyzdylyǵy atap ótildi. Memlekettiń qoldaýyna ıe bolyp otyrǵan aýyl sharýashylyǵy taýaryn óndirýshiler óz kezeginde aýylda ómir súrý sapasyn arttyrý úshin óz úlesterin qosyp, barlyq qajetti jaǵdaılardy jasaýǵa tıis.
Osyǵan deıin Qostanaı oblysynda kıikterdiń kóktemgi áýe sanaǵy júrgizilgenin jazdyq.