Bektenov: Kórshi elder men Qazaqstandaǵy janarmaı baǵasynyń aıyrmashylyǵy ulǵaıyp barady
ASTANA. KAZINFORM — Premer-mınıstr Oljas Bektenov Úkimet otyrysynda munaı ónimderiniń shekaradaǵy aınalymyn kúsheıtilgen rejımmen baqylaýdy tapsyrdy.
— Janar-jaǵarmaı materıaldarynyń baǵasyn kóterýge engizilgen moratorııdi eskeretin bolsaq, kórshiles eldermen aradaǵy baǵa dısparıteti kúsheıip keledi. Qarapaıym tilmen aıtqanda, bizdiń benzın men dızel kórshilerge qaraǵanda áldeqaıda arzan. Sondyqtan Energetıka, Saýda, Qarjy, Іshki ister mınıstrlikteri men Qarjylyq monıtorıng agenttigi jáne Ulttyq Qaýipsizdik komıtetiniń Shekara qyzmeti otyn balansyna jáne munaı ónimderiniń basqa elderge zańsyz ótip ketýine jol bermeý máselesine qatań baqylaýdy qamtamasyz etýi qajet, — dedi ol.
Sondaı-aq, Úkimet basshysy Ulttyq ekonomıka, Aýyl sharýashylyǵy jáne Saýda mınıstrlikterine ınflıatsııa deńgeıin tómendetýdi tapsyrdy.
— Baǵanyń ósýine syrtqy faktorlardyń áserin barynsha azaıtý jumystaryn kúsheıtýi qajet. Kommýnaldyq qyzmetterge tarıfterdiń shekti úlesi saqtalýǵa tıis, — dedi Oljas Bektenov.
Aıta ketý kerek, búgin Úkimettiń, Ulttyq Banktiń jáne Qarjy naryǵyn retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 3 jyldyq birlesken is-qımyl baǵdarlamasy tanystyryldy.
Budan buryn Serik Jumanǵarın Úkimettiń ınflıatsııany tejeý sharalaryn atady.