Bektenov kómir baǵasynyń negizsiz ósýine jol bermeýdi tapsyrdy
ASTANA. KAZINFORM – Óńirlerde kómir tapshylyǵy men baǵanyń negizsiz ósýine jol berilmeý kerek. Bul týraly búgin Úkimet otyrysynda Premer-mınıstr Oljas Bektenov aıtty.
- Energetıka mınıstrligi óńir ákimdikterimen birlesip, osy jyldyń 1 qyrkúıegine deıin óńirlerge áleýmettik mazýt jetkizý kestesin bekitsin. «Qazaqstan temir joly» kompanııasymen birge bekitilgen kestege jáne kólemderge sáıkes energııa nysandaryna kómir men mazýtty ýaqtyly jetkizý boıynsha sharalar qabyldasyn, - dedi Úkimet basshysy.
Premer-mınıstr halyqty jáne kommýnaldyq-turmystyq sektordy kómirmen ýaqtyly qamtamasyz etý máselesine arnaıy toqtaldy.
- Kómirdi óndirý men tasymaldaýdan bastap ony halyqqa satýǵa deıingi búkil jetkizý tizbegine qatań baqylaý ornatý qajet. Óńirlerde kómir tapshylyǵy men baǵanyń negizsiz ósýine jol berilmesin. Bul úderiske qatysýshylardyń barlyǵy óz jumysyn kómirmen qamtamasyz etýge arnalǵan qoldanystaǵy tsıfrlyq platforma aıasynda uıymdastyrýǵa tıis. Artta qalǵan ákimdikterge oryn alǵan máselelerdi tez arada joıý qajet. Jylý berý maýsymyn kestege sáıkes bastaý kerek, sonymen qatar aýa-raıynyń ózgerýi men kúnniń sýytýyna qatysty ýaqtyly áreket etý qajet, - dedi Oljas Bektenov.
Oljas Bektenov Ónerkásip jáne qurylys mınıstrligi, óńir ákimdikteri 1 qyrkúıekke deıin bilim berý jáne densaýlyq saqtaý nysandarynyń tolyq daıyndyǵyn qamtamasyz etýdi, Oqý-aǵartý, Ǵylym jáne Densaýlyq saqtaý mınıstrlikteri de bul máseleni baqylaýǵa alýdy tapsyrdy. Onyń atap ótýinshe, soltústik, ortalyq jáne shyǵys óńirler boıynsha barlyq ınjenerlik ınfraqurylym men turǵyn úı-kommýnaldyq sharýashylyq nysandary 15 qyrkúıekke deıin, al qalǵan óńirler 15 qazanǵa deıin jylýdy iske qosýǵa tolyq daıyn bolýǵa tıis.
- Meniń tapsyrmam boıynsha Premer-mınıstrdiń birinshi orynbasary barlyq óńirlerdi aralap, onyń ishinde jylytý maýsymyna daıyndyq barysyn da tekserip keldi. Nurlybek Mashbekuly, bul máseleni qatań baqylaýda ustap, ár apta saıyn óńirlerdegi jaǵdaı týraly maǵan baıandap turyńyz, - dep tapsyrdy Oljas Bektenov birinshi orynbasary Nurlybek Nálibaevqa.
Aıta keteıik, otyrysta Úkimet basshysy Oljas Bektenov ońtústik óńirlerdiń elektr energııasy senimdiligin kúsheıtýdi tapsyrdy.
