Bektenov: Kolledjderge halyqaralyq standarttardy belsendi engizý qajet
ASTANA. KAZINFORM — Ýnıversıtetter men kolledjderdiń bilim baǵdarlamasy arasyndaǵy sabaqtastyqty qamtamasyz etý kerek. Bul týraly Úkimet otyrysynda Premer-Mınıstr Oljas Bektenov málim etti.
«Bıyl kolledj stýdentteriniń stıpendııalary 50%-ǵa ósti. „Jas maman“ jobasyn iske asyrý aıasynda 180 kolledjdi qaıta jaraqtandyrý úshin respýblıkalyq bıýdjetten 48 mlrd teńge bólindi. Alaıda qabyldanyp jatqan sharalar kadr daıarlaý sapasy jaǵynan biz kútkendeı nátıje bermeı otyr. Sondyqtan kásiptik-tehnıkalyq bilim berýdi qaıta jańǵyrtý boıynsha usynylǵan jańa tásilderdi durys dep sanaımyn. Halyqaralyq salalyq standarttar men sertıfıkattaýdy belsendi túrde engizý qajet. Ol úshin Oqý-aǵartý mınıstrligi jumystyń sapasyna táýelsiz baǵalaý júrgizýi kerek. Sondaı-aq tehnologııalyq kóshbasshylardy aıqyndaı otyryp, kolledjderdi kásibı beıimdeý men saralaýdy aıaqtaýy qajet. Yntalandyrý júıesi men belgilengen KPI kolledjderdi oqý sapasyn arttyrýǵa talpyndyrady», — dedi O. Bektenov.
Onyń aıtýynsha, ýnıversıtetter men kolledjderdiń bilim berý baǵdarlamalary arasyndaǵy sabaqtastyqty qamtamasyz etý kerek.
«Dýaldy oqytýdy belsendi damytyp, memlekettik tapsyrys aıasynda kadrlardy naqty kásiporyndar úshin maqsatty daıarlaý júıesin keńeıtý qajet. Kolledjder jastarymyz ben jumys berýshiler jáne ınvestorlar úshin „tartylys ortalyǵyna“ aınalýǵa tıis. Olar mamandanýdy ózgertý nemese biliktilikti arttyrý úshin dástúrli baǵdarlamalarmen shektelip qalmaı, qysqa merzimdi oqytý baǵdarlamalaryn da usyna alady. Álemdik tájirıbe kórsetip otyrǵandaı, kadr daıarlaý sapasy memleket, kásiporyndar men oqý oryndary arasyndaǵy jaýapkershiliktiń ara-jigin naqty bólý esebinen qamtamasyz etiledi. Sondyqtan biz bıznestiń osy protsestegi róli men belsendiligin arttyrǵymyz keledi», — dedi Úkimet basshysy.
