Bektenov Almatyda qoqys óńdeý zaýytyn salý týraly kelisim jobasyn shuǵyl daıyndaýdy tapsyrdy
ASTANA. KAZINFORM – Oljas Bektenov Shanghai SUS Environment Co., Ltd. kompanııalar tobynyń prezıdenti – basqarma tóraǵasy Lýn Tszıshenmen 2024 jylǵy qarashada Qytaıǵa jumys sapary barysynda qol jetkizilgen ýaǵdalastyqtar sheńberindegi yntymaqtastyq máselelerin talqylady.
Úkimet baspasóz qyzmetiniń habarlaýynsha, basqosý barysynda Almaty qalasynda qoqys óńdeý zaýytyn salý jónindegi ınvestıtsııalyq jobany júzege asyrýǵa nazar aýdaryldy.
Kezdesýge qatysýshylar Qazaqstanda qaldyqtardy elektr energııasyna aınaldyrýǵa baǵyttalǵan Waste-to-Energy tehnologııasyn engizýdiń keleshegin sóz etti. Shanghai SUS Environment Co., Ltd. basqarma tóraǵasy Lýn Tszıshen Almatydaǵy táýligine 2 myń tonnaǵa jýyq qaldyqty qaıta óńdeıtin jáne 60 MVt-qa deıin elektr energııasyn óndiretin qoqys óńdeý zaýytynyń jobasyn tanystyrdy. Tikeleı ınvestıtsııa kólemi $270 mln-dy quraıdy.
Almaty qalasy ákimdiginiń málimetinshe, atalǵan zaýyttyń iske qosylýy megapolıstiń qatty turmystyq qaldyqtardy kádege jaratýǵa degen qajettiligin ótep, 2029 jylǵa qaraı qaldyqtardy qaıta óńdeý úlesin 80%-ǵa deıin jetkizýge múmkindik beredi.
Lýn Tszıshen kompanııanyń qaldyqtardy energııa kózine aınaldyrý salasynda QHR-da kóshbasshy ekenin, onyń qytaı naryǵyndaǵy úlesi qazirdiń ózinde 40%-dy qurap otyrǵanyn aıtty. Sonymen qatar kompanııa birqatar elde qaıta óńdeý jáne ekologııalyq ónerkásiptik parkter baǵytynda 84 jobany júzege asyrdy. Qoldanylatyn tehnologııalar ekologııalyq qaýipsizdiktiń álemdik eń joǵary standarttaryna sáıkes keledi.
Premer-mınıstr halyq sany men qajettilikterdiń ósýi jaǵdaıynda ekologııa máselelerin sheshýdiń mańyzdylyǵyn atap ótti.
— Prezıdent Qasym-Jomart Toqaev aldymyzǵa 2029 jylǵa qaraı kommýnaldyq qaldyqtardy qaıta óńdeý kólemin 38%-ǵa jetkizý mindetin qoıdy. Jyl saıyn elimizde 4,5 mln tonnadan astam kommýnaldyq qaldyq túziledi. Sondyqtan, qoqys óńdeý zaýytyn salý — qajetti joba.
Elektr energııasyn óndirý arqyly qaldyqtardy ekologııalyq kádege jaratý qaıta óńdeýdi damytýdaǵy mańyzdy qadam bolmaq. Úkimet atalǵan jobany maquldap, qajetti qoldaý kórsetýge daıyn. Biz baıypty ınvestorlarmen uzaqmerzimdi yntymaqtastyqqa múddelimiz, - dep atap ótti Oljas Bektenov.
Salalyq mınıstrlikter men Almaty qalasynyń ákimdigine eki apta merziminde zaýyt qurylysyn osy jyldyń maýsym aıynda bastaý úshin Investıtsııalar týraly kelisimniń jobasyn daıyndaýdy qamtamasyz etý tapsyryldy.
Sonymen qatar kezdesý barysynda kadr daıarlaý máselesi de sóz boldy. Joba aıasynda 500 jumys orny, onyń ishinde — 100 turaqty jumys orny ashylady. Lýn Tszıshen jergilikti mamandar jumysqa basym tártippen tartylatynyn atap ótti.