Bektenov Qyrǵyzstandaǵy shıpajaılar qurylysyn Úkimet baqylaýynda ustaıtynyn aıtty
ASTANA. KAZINFORM – Premer-mınıstr Oljas Bektenov Qyrǵyzstandaǵy qazaqstandyq shıpajaılardyń qurylys barysy men rekonstrýktsııalaý josparlarymen tanysty. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov Eýrazııalyq úkimetaralyq keńestiń otyrysyna qatysý úshin Sholpan-Ata qalasyna (Qyrǵyzstan) keldi
Kelgen bette Premer-mınıstr Oljas Bektenov «Qazaqstan» shıpajaıynyń jańa ǵımaratynyń qurylys alańynda bolyp, Ǵylym jáne joǵary bilim vıtse-mınıstri Gúlzat Kóbenova, týrızm jáne sport vıtse-mınıstri Serik Jaraspaev pen QR Prezıdenti Іs basqarmasy medıtsınalyq ortalyǵynyń basshysy Alekseı Tsoıdyń Qyrǵyzstanda ornalasqan qazaqstandyq kýrorttyq-rekreatsııalyq tórt nysannyń jaǵdaıy týraly baıandamalaryn jáne ınvestorlarmen seriktestikte olardy kezeń-kezeńimen jańǵyrtý josparlaryn tyńdady.
Premer-mınıstrge «Qazaqstan» shıpajaıynyń jańa ǵımaraty qurylysynyń josparly túrde júrgizilip jatqany: demontajdaý jáne qurylys orynyn daıyndaý jumystary aıaqtalǵany, negizgi korpýstardyń, kottedjder men sharýashylyq bloktardyń irgetasy men monolıtti qańqasyn salý jalǵasyp jatqany týraly baıandaldy.
Sondaı-aq 500 oryndyq «Samal» demalys úıine jańǵyrtý jumystaryn júrgizý josparlanǵan. Qazirdiń ózinde ınvestor anyqtalyp, ınvestıtsııalyq kelisimniń jobasy daıyndalyp, jyl boıy jumys isteıtin 3-4 juldyzdy zamanaýı qonaq úı salý úshin jobalaý-smetalyq qujattama ázirlenip jatyr.
Bosterı (Ystyqkól oblysy) aýylyndaǵy «Ýnıversıtet» sporttyq-saýyqtyrý lageri boıynsha kýrorttyq-rekreatsııalyq aımaqty damytý tujyrymdamasy ázirlenýde. Nysandy rekonstrýktsııalaý boıynsha ınvestorlarmen kelissózder júrgizilýde. Atalǵan nysan bazasynda qazaqstandyq sportshylardy jattyqtyrýǵa arnalǵan sporttyq ınfraqurylym – sport zaldary, basseınder jáne taǵy basqa nysandar qurylady.
Sondaı-aq qazaqstandyq ınvestormen birlesip «Olımp» sporttyq-saýyqtyrý ortalyǵyn jóndeý, jumys istep turǵan nysandardy rekonstrýktsııalaý jáne qosymsha sport ǵımarattaryn salý máselesi pysyqtalyp jatyr.
Premer-mınıstr jaýapty mınıstrlikter men múddeli memlekettik uıymdarǵa jobalardyń sapaly júzege asyrylýyn qamtamasyz etýdi jáne rekonstrýktsııalaýdy bastaý úshin qajetti rásimderdi jedeldetýdi tapsyrdy. Jumystar Qazaqstan Respýblıkasy Úkimetiniń baqylaýynda.
Aıta ketelik Oljas Bektenov Qyrǵyzstanmen shekaradaǵy ótkizý pýnktterin jańǵyrtý barysymen tanysty.