Bektenov Qazaqstan-Reseı óńiraralyq yntymaqtastyq forýmyna daıyndyq barysyn tekserdi
ORAL. KAZINFORM — Oljas Bektenov ónerkásiptiń jáne áleýmettik ınfraqurylymnyń damýyn, Batys Qazaqstanda ótetin Qazaqstan-Reseı óńiraralyq yntymaqtastyq forýmyna daıyndyq barysyn tekserdi. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Batys Qazaqstan oblysyna jumys sapary aıasynda ındýstrııalyq jáne áleýmettik birqatar ınfraqurylym nysanyn aralady.
Oral qalasynda QazExpoCentre-Pipe jáne «Kýbleı» otandyq kásiporyndaryn aralaý barysynda Premer-mınıstr óńirde ınvestıtsııa tartý, AÓK-te qaıta óńdeýdi keńeıtý, sondaı-aq Memleket basshysynyń halyqqa Joldaýynda atap kórsetken mindetter sheńberinde óndiriske tsıfrlyq tehnologııalar engizý boıynsha júrgizilip jatqan jumystarmen tanysty.
Batys Qazaqstan oblysy ákimdiginiń málimetinshe, bıylǵy 9 aıda ónerkásip óniminiń kólemi 4,7%-ǵa ósti. Óńdeý ónerkásibinde 20,8%-dyq joǵary serpinge qol jetkizildi.
QazExpoCentre-Pipe alańynda Premer-mınıstr munaı-gaz salasyna arnalǵan sorǵy-kompressorlyq, qaptama jáne jiksiz qubyrlar shyǵarýdyń tehnologııalyq protsesimen tanysty. Kásiporynnyń jyldyq qýaty – 40 myń tonna qubyr. Onyń ónimderi elimizdiń, jaqyn jáne alys shetelderdiń munaı óndirýshi jáne servıstik kompanııalary arasynda suranysqa ıe.
Óndiristi tsıfrlandyrý aıasynda ónimderge QR kodtaryn qoldaný júıesi engizildi. Qazirgi ýaqytta qubyrlardy radıojıilik arqyly sáıkestendirý tehnologııalary, sondaı-aq jahandyq baqylaý júıesine ıntegratsııalaý jumystary qarqyndy júrgizilýde. Sonymen qatar óndirýshiniń munaı men gaz óndirýdiń kúrdeli jaǵdaıynda joǵary germetıkalyq jáne tehnologııalyq tıimdiligin qamtamasyz etetin tól ázirlemeleri bar.
Sondaı-aq munda Premer-mınıstrge óńirdegi iri ınvestıtsııalyq jobalardyń júzege asyrylý barysy týraly baıandaldy. 2025 jyldyń І jartyjyldyǵynyń qorytyndysy boıynsha BQO-ǵa tartylǵan tikeleı sheteldik ınvestıtsııa kólemi $1,1 mlrd-ty quraǵan. Atalǵan kórsetkish boıynsha óńir el ishinde Almaty men Astanadan keıin 3-shi orynda tur. Batys Qazaqstan oblysynyń ákimi Narıman Tóreǵalıev aldaǵy bes jylda 10 myńnan astam jańa jumys ornyn ashýǵa múmkindik beretin jańa 73 ınvestıtsııalyq jobany iske qosý boıynsha júrgizilip jatqan jumystar týraly baıandady.
Oljas Bektenov ınvestıtsııalyq jobalardy júzege asyrý nátıjesi azamattardyń tabys deńgeıi men ómir súrý sapasyn arttyrý maqsatyn kózdeıtin jańa jumys oryndarynyń ashylýy men ekonomıkany damytý bolýy tıis ekenin atap ótti. Ónerkásip, energetıka, ınfraqurylymdyq damý, AÓK sııaqty jáne taǵy da basqa basym baǵyttar boıynsha ınvestorlarmen qarqyndy jumys júrgizý tapsyryldy.
«Kýbleı» JShS aýmaǵynda Premer-mınıstr aýyl sharýashylyǵy ónimderin tereń óńdeý salasyndaǵy damý qarqynymen tanysty. Kásiporynda elimizdegi konservi ónimderiniń 65%-yn óndiretin et óńdeý kesheni men zaýyt jumys isteıdi, onda 700-den astam jumys orny qurylǵan. Kompanııanyń ónim assortımenti búkil elimiz boıynsha satylatyn, sondaı-aq BAÁ, Qytaı, Túrkııa, Reseı, Qyrǵyzstan jáne taǵy da basqa elderge eksporttalatyn 200-den astam taýardy qamtıdy. Aldaǵy ýaqytta 20 myń basqa arnalǵan mal bordaqylaý alańyn salyp, shıkizat bazasyn qurý josparlanyp otyr.
Osy jyldyń úshinshi toqsanynyń qorytyndysy boıynsha BQO-da aýyl sharýashylyǵynyń jalpy ónim kólemi shamamen 6%-ǵa ósken. Et baǵytyndaǵy iri qara mal basy boıynsha óńir elimizde 1-shi orynda tur. 45,6 myń basqa arnalǵan 16 bordaqylaý alańy jumys isteıdi.
Oljas Bektenov ishki naryqty otandyq ónimmen qamtamasyz etýdiń mańyzdylyǵyn atap ótip, AÓK-te tereń óńdeýdi qarqyndy damytý qajettigine nazar aýdardy.
Búginde aýyl sharýashylyǵy taýaryn óndirýshilerge memleket tarapynan jan-jaqty qoldaý kórsetilýde. Atap aıtqanda, kóktemgi egin egý jáne kúzgi egin jınaý jumystaryn jeńildetilgen qarjylandyrý bıyl 1 trln teńgege deıin jetkizildi.
Salalyq mınıstrlikterge Batys Qazaqstan oblysynyń ákimdigimen birlesip óńirdiń áleýetin ashý, ásirese aýyl sharýashylyǵy kooperatsııasyn jáne ónimdi qaıta óńdeý men ótkizýdiń jańa tizbekterin qalyptastyrý jónindegi jumystardy kúsheıtý tapsyryldy.
Jumys sapary aıasynda Premer-mınıstr osy jyldyń 11-12 qarashasynda Oral qalasynda ótetin Qazaqstan men Reseıdiń XXI óńiraralyq yntymaqtastyq forýmyna daıyndyq barysymen tanysty.
Oblys ákiminiń orynbasary Qaıyrjan Meńdiǵalıev Prezıdent tapsyrmasymen «QazMunaıGaz» kompanııasy salǵan «Jaıyq arena» jańa sport-saýyqtyrý keshenin mysalǵa keltire otyryp, óńirdegi áleýmettik ınfraqurylymnyń damýy týraly baıandady. Buqaralyq sport túrlerine tartylǵan azamattar sanyn arttyrý úshin oblysta 22 balalar men jasóspirimder sport mektebin qosa alǵanda, 1500-den astam sport nysany jumys istep tur.
Jańa sport keshenderin, basseınder men alańdardy salýǵa jeke ınvestıtsııalar tartý boıynsha jumystar júrgizilýde. Óńirde pılottyq rejımde Qadam.AI júıesin engizý jumystary bastaldy, bul – Qazaqstanda sportty basqarýdyń alǵashqy mýltıplatformaly tsıfrlyq ekojúıesi. Joba qarjy bólýden bastap sportshylardyń jeke nátıjelerine deıingi úderisterdiń ashyqtyǵyn arttyrýǵa baǵyttalǵan.
Aıta ketelik Oljas Bektenov BQO-daǵy munaı-gaz ken oryndaryn tekserdi.