Bektenov qaýipsizdik deńgeıi tómen baspanalardy baqylaýǵa alýdy tapsyrdy
ASTANA. KAZINFORM — Qaýipsizdik deńgeıi tómen baspanalardy erekshe baqylaýǵa alý kerek. Bul týraly búgin Úkimet otyrysynda Premer-mınıstr Oljas Bektenov málim etti.
- Jumys izdep, tabys tabýǵa kelgen adamdar kóp jaǵdaıda qarapaıym, arzan baspanany jalǵa alady. Al ondaı úılerdiń qaýipsizdik deńgeıi tómen, tipti keıbiri apatty jaǵdaıda bolady. Atap aıtqanda, tek elordanyń ózinde osyndaı 860 nysan esepke alynǵan. Ótken qysta olarda 30-ǵa jýyq órt oqıǵasy boldy. Negizgi sebepteri – elektr symdarynyń qysqa tuıyqtalýy, otty abaısyz paıdalaný jáne qarapaıym órt qaýipsizdigi talaptaryn saqtamaý, - dedi Oljas Bektenov.
Osy orada Premer-mınıstr ákimdikterge Іshki ister jáne Tótenshe jaǵdaılar mınıstrlikterimen birlesip, osyndaı úı-jaılardy erekshe baqylaýǵa alýdy tapsyrdy.
- Sondaı-aq órt shyǵý qaýpi bar jaǵdaılardy anyqtap, shuǵyl sharalar qabyldaý úshin turaqty reıdter ótkizip turý qajet, - dedi Úkimet basshysy.
Buǵan deıin habarlanǵandaı, búgin Úkimet otyrysynda Premer-mınıstr Oljas Bektenov órt qaýipsizdigi máselesi boıynsha jaýapty vedomstvolarǵa reıd júrgizýdi tapsyrdy.