Bektenov Qaraǵandy oblysyndaǵy ónerkásip pen AÓK-ti damytý barysyn tekserdi
ASTANA. KAZINFORM — Premer-mınıstr Oljas Bektenov Qaraǵandy oblysynda Prezıdenttiń ónerkásipti, TKSh jáne AÓK-ti damytý jónindegi tapsyrmasynyń oryndalý barysyn tekserdi, dep habarlaıdy Úkimettiń baspasóz qyzmeti.
Premer-mınıstr Oljas Bektenov Qaraǵandy oblysyna jumys sapary barysynda Memleket basshysynyń ónerkásipti damytý, tereń óńdeýge basa nazar aýdara otyryp, ekonomıkany ártaraptandyrý, energetıkalyq ınfraqurylym men agroónerkásip keshenin damytý jónindegi tapsyrmalarynyń oryndalý barysyn tekserdi.
«Saran» ındýstrııalyq aımaǵynyń kásiporyndary, «Qarmet» AQ óndiris nysandary, onyń ishinde metallýrgııa kombınaty men «Saran» shahtasyna bardy. Energetıka, kommýnaldyq jáne aýyl sharýashylyǵy salalaryndaǵy jobalarǵa nazar aýdaryldy.
Premer-mınıstr Qaraǵandy oblysynyń Saran qalasynda ornalasqan «Saran» ındýstrııalyq aımaǵynyń damýymen tanysty.
«Qazaqstandyq ystyq myryshtaý zaýyty» JShS myryshtalǵan metall buıymdaryn óndiretin jańa kásiporynnyń ashylýyn mysalǵa ala otyryp, qosylǵan quny joǵary ónim shyǵarýdy arttyrý baǵytynda atqarylyp jatqan jumystar tekserildi. Ystyq myryshtaý nemese metall buıymdaryn tot basýdan qorǵaý qurylysta, mashına jasaý men aýyl sharýashylyǵynda jáne ekonomıkanyń basqa salalarynda keńinen qoldanylady.
Qazaqstan ónerkásibindegi oń dınamıkany eskere otyryp, myryshtalǵan metall buıymdaryna suranys jyl saıyn artyp keledi. Qýaty jylyna 50 myń tonna ónim shyǵarýǵa jetetin kásiporyndy iske qosý otandyq metall konstrýktsııalaryn óndirýshiler qajettiliginiń 80%-yn óteýge múmkindik beredi. Jobaǵa 6,2 mlrd teńge ınvestıtsııa tartylyp, onyń 80%-y – «Báıterek» holdınginiń tetikteri arqyly usynylatyn qaryz qarajaty. Zaýyt memlekettik qoldaý sharalarynyń tıimdiliginiń nátıjesinde iske qosyldy. 115 turaqty jumys ornyn ashý josparlanýda. Sonymen qatar iri óndiris oshaǵy tóńireginde shaǵyn jáne orta bıznes beldeýin damytýǵa qosymsha serpin berilmek.
Premer-mınıstr Saran qalasyndaǵy shınalar shyǵaratyn «Tengri Tyres» JShS zaýytynda boldy. Kásiporyn ımportqa táýeldilikti azaıtyp, jergilikti óndiristi damytýǵa baǵyttalǵan. Tolyq tsıkldi zaýytta halyqaralyq standarttarǵa saı tehnologııalyq barlyq protsess iske qosyldy. Bıylǵy qańtar-naýryz aılarynda Attar brendimen jalpy quny 2,6 mlrd teńge bolatyn 135,4 birlik jeńil jáne júk kólikteri dóńgelekteri jáne qysqy shınalar shyǵaryldy. Іshki naryqtyń qajettilikterin qamtamasyz etýmen qatar, jeńil kólik shınalary eksporty júzege asyrylady. «Tengri Tyres» JShS dırektory Aleksandr Ýstavşıkov jyl sońyna deıin quny 29,3 mlrd teńge bolatyn 1,2 mln shına shyǵarý jospary týraly aıtty. Qazirgi tańda zaýytta 850 adam jumys isteıdi. Tolyq jobalyq qýatyna shyǵý jalpy 1 125 turaqty jumys ornyn ashýdy qamtamasyz etedi.
Premer-mınıstr jetkizilimder kólemin odan ári arttyrýdyń jáne satý naryǵyn keńeıtýdiń mańyzdylyǵyn atap ótti.
Budan buryn Qaraǵandy oblysyna jumys sapary barysynda Premer-mınıstr Oljas Bektenovtiń tóraǵalyǵymen «Monoqalalardyń bolashaǵy: oń tájirıbe jáne turaqty damý» atty respýblıkalyq semınar-keńes ótti.