Bektenov: Qant qyzylshasyn qabyldaýda ónimniń búlinýine jol bermeý kerek
ASTANA. KAZINFORM — Kelesi egis naýqanyna qajetti kólemde sapaly tuqym qoryn qalyptastyrýǵa erekshe nazar aýdarý qajet. Bul týraly Úkimet otyrysynda Premer-mınıstr Oljas Bektenov aıtty.
— Qazirden bastap 2027 jylǵy aýyl sharýashylyǵy maýsymyn tabysty ótkizýge, onyń ishinde ony qarjylandyrýǵa tıisti negiz qalyptastyrý qajet. Aýyl sharýashylyǵyn erte qarjylandyrý tájirıbesi eginshilerdi tıimdi qoldaý quraly ekenin kórsetti. «Báıterek» holdıngi aýyl sharýashylyǵy taýaryn óndirýshilerdi ýaqtyly qarjylandyrýdy qamtamasyz etsin, — dedi Úkimet basshysy.
Premer-mınıstrdiń aıtýynsha, kelesi egis naýqanyna qajetti kólemde sapaly tuqym qoryn qalyptastyrýǵa erekshe nazar aýdarý qajet. Oblys ákimdikteri mıneraldyq tyńaıtqyshtar engizý, elıtalyq tuqymdardyń úlesin arttyrý jáne aýyl sharýashylyǵy tehnıkasy parkin jańartý boıynsha ındıkatıvtik kórsetkishterdi qamtamasyz etýi tıis.
— Qant qyzylshasyn qabyldaý jumystaryn uıymdastyrýǵa tıisti kóńil bólý qajet. Jambyl jáne Jetisý oblystarynyń ákimdikteri qant zaýyttarynyń ónimdi qabyldaýǵa jáne óńdeýge tolyq daıyn bolýyn, sondaı-aq qabyldaý pýnktteriniń úzdiksiz jumysyn qamtamasyz etýge tıis. Uzyn-sonar kezek pen jınalǵan ónimniń búlinýine jol bermeý óte mańyzdy. Jalpy, Aýyl sharýashylyǵy mınıstrligi ákimdiktermen birlesip, egin oraǵynyń sońyna deıin ahýalǵa turaqty monıtorıng júrgizip, jumystardyń ýaqtyly aıaqtalýyn jáne jınalǵan ónimniń saqtalýyn qamtamasyz etsin. Týyndaıtyn máselelerdi Úkimet janyndaǵy Jedel shtab sheńberinde dereý sheshýdi tapsyramyn, — dedi Oljas Bektenov.
Sonymen qatar Úkimet basshysy eginshilerdi zamanaýı sý únemdeý tehnologııalaryna kóshýge yntalandyrý tájirıbesin jalǵastyrý qajettigin aıtty.
