Bektenov ınvestorlarmen óńdeý ónerkásibin damytý máselelerin talqylady
ASTANA. KAZINFORM — Oljas Bektenov óńdeý ónerkásibinde iri ınvestıtsııalyq jobalardy júzege asyrý máseleleri boıynsha birqatar kezdesý ótkizdi. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Memleket basshysy alǵa qoıǵan mindetter sheńberinde ınvestıtsııalyq yntymaqtastyqty damytý máseleleri boıynsha birqatar kezdesý ótkizdi.
Atap aıtqanda, «Qazaqstandyq Sheteldik ınvestorlar keńesi» qaýymdastyǵynyń basqarma tóraǵasy Erlan Dosymbekovpen, Alstom Kazakhstan basqarýshy dırektory Jerom Boıemen jáne Polpharma Santo («Hımfarm» AQ) bas dırektory Adam Alekseıýkpen kezdesti.
«Qazaqstandyq Sheteldik ınvestorlar keńesi» qaýymdastyǵynyń basqarma tóraǵasymen kezdesýde ózara is-qımyldyń aǵymdaǵy máseleleri jáne ınvestıtsııalyq kompanııalarmen senimdi dıalogty odan ári damytý sharalary talqylandy. Elimiz úshin strategııalyq mańyzǵa ıe ınfraqurylymdyq jobalardy júzege asyrýǵa basa nazar aýdaryldy. Sondaı-aq Sheteldik ınvestorlar keńesiniń aldaǵy 38-shi jalpy otyrysynyń daıyndyq barysyna nazar aýdaryldy.
Alstom Kazakhstan basshylyǵymen kelissózder temir jol mashınasyn jasaý salasyn damytý máselelerine jáne «Elektrovoz qurastyrý zaýyty» kásipornynyń daıyn ónim eksporty naryǵyn keńeıtý perspektıvalaryna arnaldy. Búgingi tańda zaýytta óndiristi lokalızatsııalaý deńgeıi 10%-dan 35%-ǵa deıin ósti.
Polpharma Santo bas dırektorymen farmındýstrııa salasyndaǵy ınvestıtsııalyq jobany júzege asyrý barysy qaraldy. «Hımfarm» AQ dárilik zattardyń negizi bolyp sanalatyn qazaqstandyq belsendi farmatsevtıkalyq ıngredıentterdiń 80-nen astam ataýyn shyǵarýdy kózdeıdi. Joba Qazaqstannyń dári shyǵarý óndirisindegi táýelsizdigin nyǵaıtýǵa, salanyń ornyqty damýy men ınvestıtsııalyq tartymdylyǵyn qamtamasyz etýge baǵyttalǵan. Polshalyq Polpharma Group kompanııasynyń Qazaqstan ekonomıkasyna salǵan ınvestıtsııasynyń jalpy kólemi $130 mln-nan asady, 800-den astam jumys orny qurylǵan. Kompanııa portfelinde terapııanyń ártúrli salalaryndaǵy aýrýlardy emdeýge arnalǵan 12 farmatsevtıkalyq topty qamtıtyn 280-den astam balama preparat bar.
Kezdesýlerdiń qorytyndysy boıynsha Premer-mınıstr salalyq mınıstrlikter men jaýapty uıymdarǵa ınvestorlar aıtqan máseleler men usynystardy pysyqtaýdy tapsyrdy.
Aıta ketelik álemdik sáýlet alyptary Alataý qalasynyń tujyrymdamasyn tanystyrǵan edi.
