Bektenov ınflıatsııany 10% tómen deńgeıde ustaýdy tapsyrdy

— Kúni keshe Parlament palatalarynyń qorytyndy birlesken otyrysynda Memleket basshysy barlyq reformalardyń basty maqsaty halyqtyń ál-aýqatyn arttyrý ekenin atap ótti. Bıyl ınflıatsııany 10%-dan tómen deńgeıde ustap turý ornyqty ekonomıkalyq ósimge jol ashatyn mańyzdy faktor. Oǵan qol jetkizý úshin tıisti quraldar bar, — dedi O. Bektenov Úkimettiń búgingi otyrysynda.

Úkimet basshysy bul jumystar Ulttyq Bankpen úılestirile otyryp, júrgizilýge tıis ekenin atap ótti.

— Memlekettik organdardyń birinshi basshylaryna Makroekonomıkalyq turaqtandyrý jónindegi birlesken is-qımyl baǵdarlamasyn, sondaı-aq ınflıatsııany baqylaý jáne tómendetý jónindegi sharalar keshenin sapaly júzege asyrýdy qatań baqylaýǵa alýdy tapsyramyn, — dedi Premer-Mınıstr.

Onyń aıtýynsha, otandyq óndiriske qoldaý kórsetý, naryqty taýarlarmen qamtamasyz etý, saqtaý ınfraqurylymy men logıstıkany damytý sharalaryn, sondaı-aq baǵa saıasatyn retteý jáne «Investıtsııalarǵa tapsyrys berý» quraldaryn tolyq iske asyrýdy jalǵastyrý qajet.

Aıta keteıik, búgin mınıstrler kabıneti jańa Konstıtýtsııanyń kúshine enýi aıasynda Memleket basshysynyń tapsyrmalaryn oryndaý barysyn qarady.

Búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.