Bektenov Indonezııa mınıstrimen saýda-ekonomıkalyq yntymaqtastyqty talqylady
ASTANA. KAZINFORM – Qazaqstan Respýblıkasynyń Premer-mınıstri Oljas Bektenov Indonezııa Respýblıkasynyń Ekonomıkalyq ister jónindegi úılestirýshi mınıstri Aırlangga Hartartomen kezdesý ótkizdi. Onda saýda-ekonomıkalyq ózara is-qımyl jáne túrli salalardaǵy áriptestikti keńeıtý máseleleri talqylandy.
Indonezııa – Qazaqstannyń ońtústik-shyǵys Azııadaǵy mańyzdy seriktesteriniń biri. 2025 jyldyń qorytyndysy boıynsha Qazaqstan men Indonezııa arasyndaǵy ekijaqty saýda kólemi $244,7 mln-dy qurady, 2026 jyldyń qańtar-naýryz aılarynda taýar aınalymy $31,5 mln deńgeıine qalyptasty. Qazaqstandyq eksporttyń negizi óńdeý ónerkásibi, metallýrgııa jáne hımııa ónimderinen turady, al Indonezııadan elektronıka men toqyma jetkiziledi.
Buǵan deıin Qazaqstan Prezıdenti Qasym-Jomart Toqaev pen Indonezııa Prezıdenti Prabovo Sýbıanto halyqaralyq alańdarda birqatar kezdesý ótkizgeni, bul ekijaqty yntymaqtastyqty damytýǵa qosymsha serpin bergeni atap ótildi.
«Qazaqstan Indonezııamen saýda-ekonomıkalyq baılanystardy keńeıtýge úlken mán beredi. Biz bul kórsetkishterdi ulǵaıtýda eleýli áleýet bar dep sanaımyz, sondaı-aq saýda-ekonomıkalyq jáne ınvestıtsııalyq yntymaqtastyqty keńeıtýge múddelimiz», - dep atap ótti Oljas Bektenov.
Aırlangga Hartarto óz kezeginde Indonezııa tarapynyń Qazaqstanmen áriptestikti tereńdetýge, iskerlik baılanystardy keńeıtýge jáne perspektıvalyq baǵyttar boıynsha kooperatsııany damytýǵa daıyn ekendigin bildirdi.
Kezdesý barysynda energetıka, ónerkásip, aýyl sharýashylyǵy jáne azyq-túlikti qaıta óńdeý, toqyma salasy, ıslam bankıngi, tsıfrlyq ekonomıka, bilim berý jáne týrızm salalaryndaǵy ózara is-qımyldy keńeıtýde úlken áleýet bary atap ótildi.
Kólik-logıstıka boıynsha baǵdarlardy damytýǵa erekshe nazar aýdaryldy. Atap aıtqanda, Qazaqstannyń tranzıttik áleýetin jáne halyqaralyq kólik dálizderiniń ınfraqurylymyn paıdalaný múmkindikteri talqylandy. Qazaqstannyń qolaıly ınvestıtsııalyq klımat qalyptastyryp otyrǵany atalyp ótti, ol Ortalyq Azııany, EAEO elderin, Kavkazdy jáne Eýropany qosa alǵanda, óńirlik naryqtarǵa shyǵý alańy bola alady.
Jalpy alǵanda, taraptar Qazaqstan men Indonezııa arasyndaǵy ekijaqty ekonomıkalyq baılanysty odan ári nyǵaıtýǵa ózara múddeli ekendigin rastady.
Aıta keteıik, Úkimet 2026 jyly shaǵyn bızneske salyqtyq jeńildikterdi jalǵastyrady.
